Imermik puiaasamut 500 koruunilimmik tuniniaanissamut isumalluarput
- Maskiinanik atugaqassanngilagut. Iluliamut nammineerluta aallertassaagut, maanngalu tikiukkutsigu misissoqqissaarneqartassalluni. Taamaaliortoqareeraangat puiaasamut nammineerluta immiuttassavarput, Charlotte Petersen oqarpoq.
Iluliaq Original Iceberg Water nunatsinni tuniniarneqassannngilaq, taamaallaat pisuunut akissalittut taaneqartartunut, tassalu Saudi-Arabiamiittunut, De Forenede Arabiske Emirateriniittunut, Japanimiittunut USA-miittunullu tuniniarneqassalluni.
Imeq puiaasamut 100 dollareqassaaq, tassa 500 koruunit sinnilaarlugit akeqassalluni. Naak taama akeqaraluartoq Charlotte Petersen isumalluarpoq, taamatullu akeqartinneqarnissaa nassuiarlugu:
- Pisisussat inniminneereernikuupput, pisisullu akissaanut akuersereernikuupput. Puiaasap suliarineqarnera, sulisullu iluliamut aallertarnerat ulorianarsinnaammat suliarlu annertummat taama akeqartinneqarpoq, Charlotte Petersen oqarpoq.
Imeq tuniniarneqartoq umiarsuakkut timmisartukkullu siammarterneqassaaq, nittarsaanneqarneralu aallartinneqareerpoq:
- Tunisassiarput nunani assigiinngitsuni nittarsaatilereerparput, soorlu aamma atuagassaiani assigiinngitsuni nittarsaasoqartoq. Taamaammat isumalluarpugut, Iluliaq Water ApS-imi pisortap tullia Charlotte Petersen oqarpoq. Imeq puiaasamut ilusilersorluakkamut immiunneqassaaq, 750 milliliterimillu imaqassalluni.