Imermik piareersimatitaqarnissaq pingaaruteqarpoq
Qattaq imermik immerlugu piareersimatinneqassaaq, adventip kransia orpillu imermik serpalittarneqartassapput panerpallaannginniassammata, taamaaliornikkut aamma ikuallaqqajaannginnerussapput. Qatserisartoq juullilernerani taama kaammatuuteqarpoq:
Allattoq Mads Lynge
decembarip 24-at 2009 15:21
- Naneruutit ikumasut qimannaveersaarneqartassapput. Adventip kransia eqqaani serpartaammik inissiisoqarpat pitsaanerussaaq, adventip kransia ullormut ataasiarlugu serpartarneqartassaaq, taamaaliornikkut panerpallaannginniassaaq, qatserisartoq Bent Maqé oqarpoq, nangillunilu:
- Ikuallattuulissagaluarpat serpartaat atorneqarsinnaavoq, serpartaammillu peqanngikkaanni sodavandi aalaterluariarlugu serpartaatitut atorneqarsinnaalluarpoq. Eqqaamallugulu: Qattaq imermik immernikoq orpiup eqqaani piareersimatinneqassaaq, qamitsiniaraannilu tamaat kuinaveersaarlugu qamitsiniartoqartassaaq. Tamanna pingaaruteqarpoq, serpartalaarlugu ajunnginnerusarmat, Nuummi qatserisartut pisortaata tullia Bent Maqe oqarpoq.
