Imermik mingulimmik toqquteqartut ukiumut 2,2 millioniusarput

Naalagaaffit Peqatigiit imermut ippassaq ullorititaanut atatillugu, Naalagaaffiit Peqatigiit nalunaarusiaanni oqaatigineqarpoq, nakuuserneq pissutigalugu toqusartunit, matumani sorsuunnerit ilanngullugit, taakkua amerlanerusut.

Imermik toqquteqartunit 2,2 millioniusunit 1,8 millionit tassaapput meeqqat suli tallimanik ukioqalersimanngitsut. Tassa agguaqatigiissillugu 20 sekundit qaangiukkaangata meeraq ataaseq imermik mingulimmik toqquteqartarpoq. Inersimasut meeqqallu imermik mingulimmik imersimanertik pissutigalugu timminnermik nappaateqarlutik toqusarput.

Arlalinnik pissuteqartumik mingutsitsisoqartarpoq. Imeq minguttoq milliarderpassuarnik liiterilik tatsinut, kuussuarnut immamullu ullut tamaasa kuutsinneqartarpoq. Erngup minguttup ilarujussua nunap iluata ermanut kuuttarpoq taamalu nunami pukkitsumi puilasuliat imeqarfiillu allat mingutsittarlugit. Nunarsuatsinnilu inuit amerlanersaat tamakkunani najugaqarput.

Nunani ineriartortuni erngup minguttup 90 procentia minguiarneqarneq ajorpoq, taamaattumillu nunani taakkunani inuppassuit imermik toqquteqartarput.

Naalagaaffiit Peqatigiit nalunaarusiaminni imermik saliivinnut milliardikkaanik aningaasaliisoqarnissaa innersuussutigaat.