Imeq pillugu nalunaarut saqqummiunneqarpoq

Qeqertarsuarmi Uunartuarsuup puilasuata ernga tunisassiarineqarsinnaaneranut misissuineq naammassivoq, misissuisullu Greenland Ressourcesip nalunaarusiaa ippassaq saqqummiunneqarmat nalilerneqarpoq, puilasup ernga pitsaalluinnartoq, naleqquttoq tunisassiarinissaanullu naammattoq, tunisassiornissamut suleqatigiinni Qeqertarsuullu kommuneani pisortaq Ove Berthelsen oqarpoq.

Aamma oqarpoq, puilasup ernga nunanut allanut tunisassiarineqarluarsinnaasutut taaneqarsimasoq, taamalu Nunatsinni erngup puiaasanut poorlugu ukiup ataatsip ingerlanerani tuniniarneqartartup annertoqqataa, namminneq Qeqertarsuarmi ullut marluk ingerlanerinnaani tunisassiarisinnaagitsik.

Erngup tunisassiarilernissaanut suleqatigiit maanna ingerlariaqqissapput. Nalunaarusiaq ingerlariaqqinnissarlu pillugit Qeqertarsuup kommunalbestyrelsea novembarip 26-ani nassuiaanneqassapput, taamaatuttaaq Pilersuisoq SIK-llu suliffissaqartitsiniarnermut aningaasateqarfia ilisimatinneqassallutik.

Tunisassiulernissamut avataani pisissussarsiornissaq aningaasaliisussarsiornissarlu tullinnguuttut Ove Berthelsenip oqaatigaa. Aningaasat 40 million koruunit atorfissaqartinneqarput, suleqatigiillu isumaqarput, nunatsinnit aningaasaliisoqarpat pitsaanerussasoq.