Imeq Nuummeersoq nioqqutissiarineqalerpoq

Nunatsinni arlaqartut imermik nunani allani maqitamik pisiniarfinni pisisarput. Imermik maqitamik pisisartut taakku imermik nunatsinni maqitamik pisinissaminnut aamma periarfissaqalissapput, imermik nunatsinneersumik dunkinut 2 literikkaanut maqitanik Nuuk Imeq nioqqutissiulermat. Dunkit Nuuk Imermit maqitat Nuummi pisiniarfinni takussaalereersut qaammatip matuma tulliani sinerissami pisiniarfinni allani aamma tuniniarneqalissapput.

Nuuk Imermi pisortaq Henrik Estrup oqarpoq ilisimasatik naapertorlugit imeq nunanit allaneersoq 300.000 literi nunatsinni ukiumut pisiarineqartartoq.

Imermik nunatsinneersumik nunatta avataanut nioqqutissiulernissaq matumani siunertaanngitsoq Nuuk Imermi pisortaq erseqqissaavoq.

- Nunanut allanut tunisassiulersinnaanissaq misissoreerparput paasivarpulli akisuallaassasoq, taamaattumik nunatsinni tuniniaanissatsinni pisisartut imermik ruujorineersumik imerusunngitsut periarfissinniarpagut, Henrik Estrup oqarpoq.