Imeq nunat tamalaat ataatsimeersuassutigaat

Oqallisigeqqittariaqanngilaq. Nunarsuarmiut imermik qanoq atuinissartik ilikkartariaqarpaat, inuillu tamarmik imermik pissarsisinnaanerat maannakkut sulissutigineqartariaqalerpoq.

-Silaannaq allanngoriartorpoq tamannalu imeqassutsimut sunniuteqassaaq, imermillu atuinissamik ilakkanngikkutta tamanna nunarsuarmut tamarmut kinguneqapiluttussaavoq.

Danmark-ip Naalagaaffiillu Peqatigiit aaqqissugaat Københavnimi ataatsimeersuarneq ullumi aallartittoq ammarlugu oqariartuut taama nipeqarpoq, ataatsimeersuarnermut peqataapput nunani tamalaani kattuffissuarnit nunallu ineriartortutut taaneqartartut.

Silaannaap kissakkiartornerata imissaqarniarnermut pingaaruteqaqisumut ilungersunaqisumik sunniuteqarsinnaatiginera, Naalagaaffiit Peqatigiit avatangiisit pillugit suliniutaanni pisortaasup Achim Steinerip assersuuteqarfigaa.

- Himalaya-p qaqqarsuini Afrikallu qaqqaasa portunersaanni Kilimanjaro-mi sermitat maannakkut aallutik tammarluinnalerput, Indiamilu kuussuit ukiumut piffissap ilaannaani kuuttalerput.

Tamannalu inuppassuarnut millionilikkuutaanut piitsooreeqisunut imissaaleqilernermik kinguneqarnerluttussanngussaaq, Achim Steiner erseqqissaavoq.

- Inuit annilaangapput, takusinnaangamikkumi pissutsit allarluinnaat atuukkiartulersut, Steiner oqarpoq.

København-imi ataatsimeersuarneq imissaqarniarneq pillugu suli saqqummiussuiffiusussaavoq, nunat ineriartortut pillugit 2015-p tungaanut sammitinneqartumik.