Imeq nunarsuatsinni sipaarneqartariaqalerpoq

aggustip 16-at 2006 08:12

Nunani piitsuniinnaanngitsoq imeq amigaatigineqarpoq. Nunat pisuut imermik amigaateqalissanngikkunik imermik atuinertik allanngortittariaqarpaat, Pinngortitaq pillugu nunarsuaq tamakkerlugu suliniaqatigiiffik, WWF, taama naliliivoq.

Imeqarniarneq nunani suliffissuaqarfiusuni misissuivigineqartareersorlu, takuneqarsinnaanngorpoq imeqarniarnerup illoqarfinni amerlaqisuni annikilliartornera maanna ilungersunarsereersoq.

Imermik sipaarnerunissaq naalakkersuisunit kaammattuutigineqartalereeraluartoq, tamanna amerlanertigut malinneqanngilaq.

- Suliffeqarfissuarni illoqarfinnilu inuttusigaluttuinnartuni erngup atorneqarpallaaleriartuinnarnera panernersuaqalersinnaaneranik ernumatitsileriaannaavoq, WWF ilisimatitsivoq.