Inatsisip pingasunngormat atuutilernerata ilutigisaanik, umiarsuit kitsimaqumminnik nunatta avataanut sømilinik pingasunik ungasitsigisumut imaarsiartortalissapput.Assi: Henrik Madsen/Grønlands Politi

Imeq kitsimaqut takornartanik uumasoqatigiiaaqarsinnaasoq avataanut kuutsinneqartassasoq

Nunarput Naalagaaffiit Peqatigiit imeq kitsimaqut pillugu isumaqatigiissutaannut ilannguppoq. Tamanna umiarsuit kitsimaqumminnik imiusumik avataanut sømilinik 50-inik ungasitsigisumut imaarsiartortalernerannik ilaatigut kinguneqassaaq.

Inatsisartut Naalakkersuisut inatsisissatut siunnersuutaat pingasunngormat akueraat. Taanna nunatta Naalagaaffiit Peqatigiit imeq kitsimaqut pillugu isumaqatigiissutaannut ilanngunneranut attuumassuteqarpoq.

Umiarsuit assartuuterpassuit imermik kitsimaquteqarput. Imeq taanna umiarsuit uaavallaannginnissaannut iluaqutaasartoq immameersuummat takornartanik uumasoqatigiiaaqarsinnaasarpoq.

Uumasoqatigiiaat takornartat

 

Uumasoqatigiiaat takornartat tassaapput, nunarsuup imarpiini sumiiffinnaaminniinngitsut. Taakkua nunarsuaq tamakkerlugu ajornartorsiutaaleraluttuinnartut immami uumassusillit assigiinngisitaarnerannut aalisarnermullu sunniuteqarnerlorujussuarsinnaapput.

 

Tusarfik: Naalakkersuisut.

Imeq kitsimaqut nunatta imartaani uumassusillit ataqatigiiaarnerannut ajornartorsiortitsilersinnaavoq. Umiarsuimmi nunatta imartaanukartut kitsimaqumminnik takornartanik uumasoqatigiiaaqarsinnaasumik imaarsigaangamik, nunatta imartaani uumassusillit ataqatigiiaarnerat innarlerataannaasarpaat.

- Avatangiisit imermik kitsimaqummik takornartanik uumasoqatigiiaaqarsinnaasumik imaarsaanermi innarlerneqangaatsiartarput. Uumasoqatigiiaat takornartat nunarsuaq tamakkerlugu ajornartorsiutaaleraluttuinnartut immami uumassusillit assigiinngissitaarnerannut aalisarnermullu sunniuteqarnerlorujussuarsinnaapput, Namminersorlutik tusagassiutinut nalunaarput.

Nunatsinnili suli ajornartorsiutaalinngikkaluartut siunissami ajornartorsiutaalersinnaapput.

AAMMA ATUARUK Uuliasiornermut periusissiaq nutaaq: Inatsisartuni illuatungiliuttut qisuariaatigaat

Nunatta imartai umiartorfigineqarneruleraluttuinnartillugit umiarsuit kitsimaqumminnik nunatta imartaanut imaarsisartut amerliartuinnartussaapput.

Taamaammat Naalakkersuisut tamatumani maleruagassat sukaterniarpaat.

Imeq kitsimaqut suua?

Umiarsuit assartuuterpassuit uaavallaannginniassagamik imermik oqimaaloqutaqartarput. Imeq taanna immameersuummat takornartanik uumasoqatigiiaaqarsinnaasarpoq.

Inatsisip pingasunngormat atuutilernerata ilutigisaanik, umiarsuit kitsimaqumminnik nunatta avataanut sømilinik 50-inik ungasitsigisumut imaarsiartortalissapput.

Suliffeqarnermut, ilisimatusarnermut avatangiisinullu naalakkersuisup, Jess Svanep,  nunatta isumaqatigiissummut tassunga ilanngunnera naammagisimaarpaa.

- Nunatta imartai takornartanik maanna uumasoqatigiiaaqanngingajapput, silalli pissusiata allanngoriartornerani umiarsuillu Issittup imartaanukartut amerliartorneranni nunatta imartai takornartanik uumasoqatigiiaaqaleratarsinnaasutut ilimanaateqarneruleraluttuinnarput. Akisuussaassuseqarnerput imeq kitsimaqut pillugu isumaqatigiissummut ilaalernikkut takutipparput, nunarpullu siunissamut isigisuusoq piujuartitsisumillu atuiffiulluni nunatsinni uumassusillit assigiinngissitaarnerinut aalisarnermullu illersuiffiusoq ersarissarlutigu.

Imartami avatangiisinut illersuinissamut inatsit 2017-imeersoq imeq kitsimaqut pillugut malittarisassanik maleruagassanillu imaqareermat, nunarput taakkuninnga malinnilereerpoq. Nunanili tamalaani piumasaqaatit naapertorneqarnissaat nunatta isumaqatigiissummut ilanngunneratigut qulakkeerneqarpoq.

- Umiarsuit, soorlu takornariartaassuit, nunat allat erfalasuinik erfalasoqarlutik angalasut imeq kitsimaqut pillugu maleruagassat naalagaaffimmi erfalasoqarfimminni akuerisaasut malittussaavaat. Naalagaaffik erfalasoqarfiusoq imeq kitsimaqut pillugu isumaqatigiissummut akuersisimanngippat, umiarsuup takornariartaatip naalagaaffimmut isumaqatigiissummut ilaasumut tikissaguni isumaqatigiissut suli malittussaavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat