Imeq innaallagiarlu akikillissapput

Nukissiorfiit innaallagissamut, imermut kiassarnermullu akit nutaat Naalakkersuisunit decembarip aallaqqaataani akuerineqarput.

Amerlanernullu innaallagiaq imerlu 2012-imi akikinnerulissaaq.

Innaallagissamut akit nutaat Sisimiuniunerusoq nuannaartitsissapput, Sisimiuni erngup nukinganik nukissiorfik nutaaq ukioq manna atulermat akit qaffangaatsiarnera malugisimavaat.

Sisimiuni uulia atorlugu innaallagissiornermiit erngup nukinganit nukissiornermut ikaarsaariarneq 2012-imi akitigut malugissavaat, innaallagissap akia kilowatimut 1,83 koruunimik akikillissaaq - Nuummisulli kilowatimut 1,65 koruunimik akeqalissagami.

Qaqortumi Narsamilu innaallagiaq kilowatimut 1,17 koruunimik akitsussaaq. Ungasianiit uuttuutinik ikkussuunneqarnerisa Qorlortorsuarmilu erngup nukinganik nukissiorfiup isumaqatigiissutiginiarneranut aningaasartuutit pillugit akit qaffanneqassapput.

Innaallagissamut akit illoqarfinni nunaqarfinnilu ataatsimut 15 øremik akikillissapput - imermullu akit sumiiffinni amerlanerni kubikmeterimut 77 øremik akikillissallutik.

Linki ataaniittoq toorlugu illoqarfigisanni akit nutaat takusinnaavatit.