Imeq atoriigaq salillugu atoqqittalissavaat
Australiami ukiup ilaani qinersinissamut atatillugu silaannaap allanngoriartornera panernersuaqartarneralu assut oqallisigineqarput. Sumiiffiit ilaanni pilersaarutigineqarpoq australiamiut imissaaleqineq patsisigalugu imermik atoriikkamik salitamik imeqalissasut. Tamannalu aalassaataaqaaq.
Naalagaaffimmi Queenslandimi innuttaasut imermik atoriikkamik salitamik maannakkuugallartoq imeqalertariaqarput. Politikerilli arlallit oqaatigaat panernersuup kinguneranik nunap ilaani naalagaaffinni arlalinni imermik atoriikkamik salitamik imeqalernissaq naatsorsuutigineqartariaqassasoq.
Massakkut ingasattumik panernersuaqarpoq. Ukiut tulleriiaaginnaat arfinillit ingerlanerini siallinngingajassimavoq imaluunniit sialoqanngivittarluni, tamatumalu kinguneraa ukiut untritillit ingerlaneranni nuna aatsaat taama panertigitillugu misigineqarmat. Taamaattumik Australiami silaannaap allanngoriartornera panernersuaqarneralu naalakkersuinikkut massakkut aamma oqallisigineqaqaat.
Ministeriuneq konservativiusoq John Harward Australiami ukiut aqqanillit pissaanermik tigumiaqareerpoq. Silaannaap allanngoriartornera pillugu Kyoto-mi isumaqatigiissut manna tikillugu atsioqataaffigerusunngilaa. Kisianni naalakkersuinikkut illuatungerisaa, Sulisartut Partiiat, isumaqatigiissummut tassunga atsioqataarusuppoq. Isumasiuinerillu naapertorlugit taakkua siuartuupput. Ukiamullu qinersinissaq sioqqullugu avatangiisinut tunngasunik ministeriuneq taamaalilluni soqutiginnileriataarsimavoq.
