Imeq atoriigaq immamik mingutsitsivoq

Nunatsinni najugaqarfinni amerlaqisuni imeq atoriigaq imaanut maqineqanngikkuni kuutsiinnarneqartarpoq, taamaasillunilu mingutsitsilluni. Imermik atoriikkamik akuikkamik imaanut maqitsisarneq nunani avannarlerni atorneqarluarpoq, avatangiisinut minguitsuutitsiniarnermut assut iluaqutaalluni. Erngup atoriikkap qanoq pineqarsinnaanera issittumi avatangiisit pillugit Sisimiuni isumasioqatigiinnermi aamma sammineqarpoq. Kalaallit imermut atoriikkamut akuiaammik peqalersinnaapput avatangiiserlu minguinnerulersillugu. Imermik atoriikkamik akuiaaneq inuussutissarsiutinik nutaanik aamma pilersitsisinnaasoq, Sisimiuni isumasioqatigiinnermi peqataasoq Danmarkimi Kongstedimi maskinaliorfiup pisortaa Brian Lang oqarpoq.

Erroraangatta uffaraangattalu tamatigut qaqorsaasertarpugut, errorsigaangattalu qaqorsaatinik aamma atuilluartarluta, minnerunngitsumik eqqarsaatigilaariaruk Nuummi inuuttaasut 16.000-it illoqarfinnilumi allani inuttaasut ullormut qasseriarlutik perusuersariartartortartut, imerlu atoriigaq atoriigaq akuutissanik eqqakkanillu assigiinngitsorpassuarnik akulik salinneqanngitsorlu imaanut maqiinnarneqartartoq. Mingutsitsinerpulli killilersimaarsinnaavarput, imermut atoriikkatsinnut akuiaammik peqalersuugutta. Danmarkimi Kongstedip maskinaliorfiata pisortaa Brian Lang Sisimiuni isumasioqatigiinnermi peqaasoq oqarpoq imermut atoriikkamut akuiaat nunani avannarlerni iluaqutaaqisoq issittumut aamma naleqqulluartoq.

- Akuiaatip imeq sumullunniit atoriigaq salittarpaa. Illut ataasiakkaat ineqarfiit illoqarfiillu akuiaateqalersinnaapput, taamaattoqalerpallu soorlu anartarfilerisarneq pisariaarutissaaq. Aamma illoqarfiit avataanni imaq taamalilluni mingoqarpallaarunnaarluni isorujuppallaarunnaassaaq, takornarianut kajungernarnerulerluni. Nunani avannarlerni allani imermik akuiaanermi sinnikut igitassat aserorteqqissaarneqartarput nunamik naggorissaanermut atorneqarluartarlutik. Tamatuma saniatigut akuiaatip atortussaanik tankissaanillu Kaalallit Nunaanni nammineerluni sanaartortoqarsinnaalluarpoq, taamaalillunilu suliffissanik nutaanik pilersitsisoqarluni, Brian Lang oqarpoq.

Brian Langip aamma naatsorsuutigilluinnarnerarpaa nunatsinni imermik atoriikkamik saliisalertoqartuuppat avaterput imaq erseqqarinnerulissasoq nunattalu nunatut minguitsutut ilisimaneqarneranut iluaqutaassalluni.