Imeq aningaasarsiutitut pimooruttariaqarsoraa

Folketingip ataatsimiinnera ammarlugu ippassaq oqalittoqarmat Atlantikup Avannaani Suleqatigiit oqaaseqartoraat Lars-Emil Johansen. Oqalugiarnermini oqariartuutaasa pingaarnersaraat kalaallit namminersulivikkusunnerat. Taamatut oqarnerminut pissutigaa kingullermik folketingimut qinersinerup takutikkaa namminersulivinnissaq kalaallinit kissaatigineqartoq.

Kalaallit Nunaat aningaasaqarnikkut nammineq ingerlasinnaalernissaata anguniarnissaata saniatigut bloktilskudip annikillisikkiartortinneqarnissaa Lars-Emil Johansen-ip oqaatigaa. Nangilluni oqarpoq Kalaallit Nunaata pisuussutaat tassaasut aalisakkat, takornariaqarneq aammalu pisuussutit uumaatsut saniatigut, USA-mik suleqateqarnikkut imeq aningaasarsiuutigineqarluarsinnaasoq oqaatigaa.

Tamakkua saniatigut angorusunneqarput Kalaallit nunaata politikeriisa nunanut allanut tunngassuteqartunut oqartussaanerulersinneqarnerisa saniatigut Kalaallit Nunaata nammineerluni tunngaviusumik inatsimmik peqalernissaa.