Imatut 14 millioner koruunit pissarsiaraat
Tamanna naalakkersuisut siulittaasuata Kuupik Kleistip Malik Berthelsenimut akissutaani atuarneqarsinnaavoq. Malik Berthelsenip januaari naalersoq apeqquteqaatigaa, soraarnermut atatillugu pissarsiassat oqallisaaqisut kikkunnit isumaqatigiinniutigineqarsimanersut.
Isumaqatigiissutip taassuma kinguneranik pisortaasimasut taakku marluk, Royal Greenlandimi soraarnerminnut atatillugu 14 millionit koruunit missaat avippaat.
Pisortat taakku marluk isumaqatigiissutaat 2007-imi martsip arfineq pingajuanni siulersuisut oqaluuseraat, martsillu 22-anni isumaqatigiissutigineqarlutik.
Taamaattorli siulersuisut ataatsimiinnerinit imaqarniliami oqaatigineqarpoq, siulersuisuni ilaasortat taakku marluk isumaqatigiissutissaminnut tunngasut - tassa millionerpassuit pissatik - oqallisigineqalermata ataatsimiiffik qimakkallarsimagaat.
Taamanikkut siulersuisuni siulittaasoq Peter Grønvold Samuelsen nalunaarpoq Pâviâraq Heilmannip isumaqatigiissutissaa oqallisigineqalermat, suliamut attuumassuteqarpallaarnini pissutigalugu aalajangeeqataasinnaanani.
Siulersuisuni ilaasortat soraarnerminnut atatillugu 14 millionit koruuninik avitsinissamut isumaqatigiissuteqarnissaannut akuersisut tassaapput, sulisut ilaasortaatitaat pingasuusut, aningaaserivimmi pisortaq Sven Lyse, eqqartuussissuserisoq Finn Meinel massakkullu Qeqqata Kommuniani pisortaq Paneeraq Olsen.
