Imarsiornermit ilinniarfiit Nuummut eqiterniarpaat
Piniarnermulli- Aalisarnermullu ilinniarnermut atatillugu Sisimiuni praktikkertoqartalissasoq aamma aalajangiunneqarpoq.
- Imarsiornermik Ilinniarfiup siulersuisuisa tamarmiullutik Imarsiornermik Ilinniarfiup nuunneqarnissaanik Naalakkersuisut aalajangiussaat tapersersornerarpaat, umiarsuarnilu naalaganngorniarfiup Nuummut nuunneqarnissaa aamma nuannaarutiginerarlugu. Ilinniarfiimmi taakku siunissaasa piffissami sivitsulersumi paamaarunneqarsimanerat tamaanga killeqarpoq, Imarsiornermik Ilinniarfik tusagassiuutinut nalunaarummini allappoq.
Naalakkersuisut taama aalajangiineranni Imarsiornermut ilinniarfiit pillugit suleqatigiissitap innersuussutaa malissimagaat malunnarpoq. Suleqatigiissitaliaq Ilinniartitaanermut Ilisimatusarnermullu naalakkersuisoqarfiup pilersitaraa.
Ilinniarfiit nussorneqarneri ilinniarfiit pitsanngorsarneqarnerinik aallaaveqarpoq, imarsiornermillu ilinniartut taamaatittartut amerlavallaarneri allannguinerup aallaavigai, taamaatiinnartartullu ilinniarfimminni amigartumik sammisassaqartitaasarneri, taavalu pikkorissaanerit amigartarneri, taamatut aalajangiinermut aallaaviupput, maannalu aaqqiissuteqarnermi tamakku qaangerneqarnissaat neriuutigineqarpoq.
