Imarsiornermik ilinniarfik matuneqassanngilaq
- Umiartornermut ilinniarfik Paamiuniiginnassaaq, qinnuteqartullu amerlassusaat apeqqutaalluinnassaaq ikippallaarpata allamut innersuussisariaqassaagut, qinnuteqartullu amerlaneruppata Paamiuni ilinniartitsineq nalilersoqqissavarput, Mimi Karlsen oqarpoq.
Umiarsuarnut naalaganngorniarluni 2009-mi qinnuteqartoq atasiinaavoq, tamannalu inuusuttut nunanut allani ilinniarusunnerulernerannik pissuteqartoq, Mimi Karlsen aamma oqarpoq.
Kim Kielsen-ip kalaallisuinnaq oqaasillit ilinniarsinnaalernerannut mattunneqarnissaat ernummatigalugu oqarpoq.
- Skipperinngorniaraani piumasaqaatinut ilaavoq 11. klasseminngaaniit danskisut tuluttullu oqalussinnaanissaq paasinnissinnaanerlu, skipperiugaannilu piumasaqaataavoq imarsiornermi ingammik tuluttut oqaluussaqarsinnaanissaq tamannalu tunuliaqutaasoq, Ilinniartitaanermut naalakkersuisoq oqarpoq.
Ilulissani Nuummilu naalaganngorniat 1980-mi90-imilu amerlasuut naamassipput, taamanikkullu ilinniartuusimasut oqaatsitigut piginnaasaat annikimmata immikkut akuerineqarlutik ilinniartinneqarput, taakkulu nunani allani umiarsuarmi naalakkatut atorsinnaanatillu 30 sømil-it qaangerlugit ingerlatseqqusaanngillat.
