Imarsiornermik Ilinniarfiit aaqqissuunneqarnissaat inissinneqarpoq
Aalajangiinermi qulakkeerneqarpoq imarsiornikkut ilinniarfiit siammasissumik suli inissisimassasut, aaliangerneqarmat tunngaviusumik imarsiornermi ilinniartitaanerit Paamiuni inissisimaannassasut. Imarsiornermi qaffasinnerusumik ilinniartitaanerit soorlu naalagassatut ilinniartitaanerit Nuummut inissinneqassapput, tamatumani qulakkeerniarneqarmat imarsiornermi ingerlatsiveqarfiit qanimut suleqatigineqarnissaat. Piniarnermut Aalisarnermullu Ilinniarfik Uummannamiittiinnarneqassaaq. Taamatuttaaq aalajangiunneqarpoq, taakkua immikkoortut pingasuusut ataatsimoorussaminnik pisortaqartinneqassasut.
Taamatut aalajangiisoqarneranut atatillugu Ilinniartitaanermut, Ilageeqarnermut, Kulturimut Naligiissitaanermullu Naalakkersuisoq Nick Nielsen imatut oqaaseqarpoq: -Naalakkersuisunut pingaaruteqarsimavoq qineqqusaarnermi neriorsuutigut piviusunngortinnissaat. Tamatuma saniatigut siulersuisut oqariartuutaat Naalakkersuisut tusaaniarsimavaat, taakkumi inassutigisimammassuk angallatini naalagassatut ilinniarfik Nuummut nuunneqarnissaa. Sinerissami ilinniarfiit siammasitsikkusuppagut, aalajangiineq imatut paasineqassaaq Naalakkersuisut oqimaaqatigiissumik ineriartortitsinissaq qulakkeerniarsimagaat.
Periarfissiissutigineqarusuppoq imarsiornermik ilinniarfinni atuarsinnaanissaq inuussutissarsiornerup iluani pisariaqartinneqartut toqqammavigalugit. Imarsiornermik inuussutissarsiorfiit tamatumuuna tusaaniarneqarsimapput, angallatini naalagassatut ilinniarfiup Nuummi inissinneqarnissaanut.
-Aalisarneq inuussutissarsiuteqarnitsinni pingaarnerpaatut inissisimasuuvoq. Taamaattumik qularutiginngilara, imaatigut inuussutissarsiuteqarnermik ingerlartaqartut oqaloqatigilluarnerisigut, tamatumanilu mikinngitsumik ilinniarfimmi siulersuisut tusaaniarnerisigut, qulakkeersinnaassagipput imarsiornermik ilinniarfinni, imaani inuussutissarsiuteqartut pisariaqartitaat toqqammavigalugit siuarsaasoqartuarnissaa. Eqqumaffigivara imarsiornermik inuussutissutissarsiuteqarnerit aatsitassarsiornermik sammisumik suliniuteqarnertuulli inuussutissarsiutigalugu ineriartortuummat. Taamaattumik pingaaruteqarluinnartuuvoq siunissami suliassaqartitsiniarnermut ineriartortitsinissamut qulakkeerniassallugu, siunissami nunaqavissut imarsiornermik inuussutissarsiuteqarnermi sulisorineqartuarsinnaanissaat, taamatut oqaaseqarluni itisiliivoq Naalakkersuisoq Nick Nielsen.
