Imarpik qulaallugu timmisartuussinissat siusinnerpaamik pingasunngorpat pisussanngorput
Imarpik qulaallugu apriilip 23-at ilanngullugu angalasussaagaluartut bilitsitik pisiffigisaminni kingusinnerusukkut allanngortissinnaavaat, imaluunniit utertissinnaallugit.
Air Greenlandip nunatta iluani timmisartuussinissani ingerlatiinnartussaavai, Danmarkimulli angalaniartunut bilitsinik tuniniaaneq apriilip 30-ata tungaanut matuneqarallarpoq, Kastrupimiillu nassiussanik tigooraasoqarunnaarluni.
Ilaasussat ingerlariaqqinneq ajuleqqasut saaffiginnittarfimmut unnugu nalunaaqutaq arfineq pingasut tungaanut ammatinneqartussamut sianersinnaapput. saaffiginnittarfiullu normoraa 34 33 35. Nittartakkakkut airgreenland.gl-ikkut aamma malinnaasoqarsinnaavoq.
Naak Danmarkimi timmisartuussinissat aqagumut aallarteqqittussatut nalunaarutigineqaraluartut naalagaaffiup timmisartortitsinermut nakkutilliisoqarfia, Navair nalunaarpoq, Danmarkimi qaqugu timmisartuussisoqarsinnaalernera oqaatigissallugu suli siusippallaartoq.
Norgemi Trondheimimi mittarfiup ammaqqinneratigut Icelandair timmisartunik tallimanik Keflavikimit Trondheimukatitsivoq, taamaalilluni ilaasussat Islandimit Europaliarniartut apuuffissaminnut timmisartuunneqartussanngorput.
Frankrigip kujataaniittut mittarfiit pingasut Spaniallu avannaatungaaniittut mittarfiit tamarmik aamma ammaqqittut, DR-imi allaaserineqarpoq.
Islandimit arsakut europamut siaruaattuarallassapput, anorilu sapaatip akunnerata tulliani allamut aatsaat saqissasoq, Islandimilu qaqqap innermik anitsiuarallarnissaa aamma ilimasaarutigineqartoq nutaarsiassaqartitsivimmi Ritzauimi allaaserineqarpoq.
