Imarpik qulaallugu timmisartoqarfik tikilluaqqusaasoq

Nuummi timmisartoqarfik 1799 meterinngorlugu tallineqarpat, nunatsinnut takornariat amerlanerulissapput. Taama Nuup kommuneata naatsorsueqqissaartarfik namminersortoq HS Analyse suleqatigalugu, Nuummi timmisartoqarfiup tallineqarsinnaanera pillugu, Nuummi sinerissamilu innuttaasunik isumasiuisitsinera inerneqarpoq.

Isumasiunerup takutippaa Nuummiinnaanngitsoq aammali illoqarfinni allani soorlu Paamiuni Maniitsumilu innuttaasunit Nuummi kommunalbestyrelsep timmisartoqarfiup tallineqartariaqarneranik isumaanut tapersersuisut, tassa sinerissami Nuummilu aperineqartut amerlanersaat isumaqarput, Nuummi timmisartoqarfik tallineqartariaqartoq, taamaalilluni nunatsinnut takornariat amerliniassammata.

Nuup kommuneata timmisartoqarfiup tallineqarsinnaanera pillugu isumasiuititsinerani Kommuneqarfinni qulini innuttaasut katillugit 659-it aperineqarput. Taakkunannga 555-it akisimallutik. 

Nuummi innuttaasut 70 procentit Maniitsumi Paamiunilu 92 procentit kiisalu kommuneqarfinni allani arfineq marlunni aperineqartut 57 procentii isumaqarput, Nuummi timmisartoqarfik talineqartuuppat takornariat amerlissasut. Timmisartoqarfik tallineqarpat taamaalillunilu Nuup Kommunalbestyrelseata pilersaarutaa billitsit 3000 koruuniniit 5000 koruunit angullugit akikillinissaat piviusunngussappat, aperineqartut 77 procentii isumaqarput angalanerulersinnaallutik.