Imaqarniliaq ukioq ataaseq utaqqineqarpoq
Piniarneq pillugu isumasiuisitsisoqarneranit imaqarniliaq sivisuumik utaqqineqareerluni kiisami naammassingajalerpoq, ilimagineqarporlu februaarip aallartinnerani naammassissasoq. Aalisarnermut, Piniarnermut Nunalerinermullu Naalakkersuisoqarfimmit tamanna nalunaarutigineqarpoq.
Allattoq Louise M. Kleemann
Isumasiuisitsineq februaarimi 2008-mi pivoq, imaqarniliarli tassa ukioq ataaseq utaqqineqarpoq.
Taama sivisutigisumik utaqqineqarneranut sulisunik amigaateqarneq Pisortaqarfiup pissutaanerarpaa.
Imaqarniliap saniatigut piniartunut ingerlatitseqqiinissami atuagassiaq Naalakkersuisoqarfimmit suliarineqarpoq. Atuagassiaq KNAPK-p ilaasortaminut saqqummersittagaanut, Sineriassortoq-mut, ilanngullugu piniartunut nassiussuunneqassaaq. Sineriassortoq-p marsimi saqqummernissaa naatsorsuutigineqarpoq.
Atuagassiaq www.nanoq.gl-ikkut aamma aaneqarsuinnaassaaq.