Ilinniarneq

IMAK: Taama ikitsigisut akineri ajuusaarnarpoq

Meeqqat Atuarfiat pillugu ilinniartitsisut qanoq tamatumunnga isumaqarnersut, IMAK-ip misissuisitsinerani, Danmarks Evalueringsinstitutimit isumagineqartumi, ilinniartitsisut 25 procentiinnaasa akisimanerat, ilinniartitsisut kattuffiannit IMAK-imit ulloq manna tikillugu oqaaseqarfigineqanngitsoq, kiisami siulittaasuata Sivso Dorphip tamanna maanna oqaaseqarfigaa.

Allattoq Apollo Jeremiassen

januaarip 27-at 2015 04:17

- Soorunami ajuusaarnarpoq ilinniartitsisut taama ikitsisigut akisimammata. Tamanna ilinniartitsisut, Jeppe Jeppesenip KNR-imit tallimanngormat aperineqarluni nassuiaataa uteqqilaaginnassavara, tassa apeqqutit akisassat siullermik nassiussuunneqarmata ilinniartitsisut tassunga qarasaasiakkut iserniarnertik ajornartorsiutigisimavaat. Taamaalillutilli arlallit akisinnaasimanatik. Tassalu tamannarpiaq pissutaalluni akissutigineqartut 25 procentiinnaapput.

Aamma atuaruk Nivi Olsenip 25 procentit ajuusaarutigai

Ilinniartitsisup Jeppe Jeppesenip KNR-imit tallimanngormat aperineqarluni akisissutaa taamaalillugu IMAK-ip siulittaasuata taama aammaarlugu akissutigaa.

- Illit qanoq oqaasertalersinnaaviuk taama ikitsigisut akisimaneri?

- Tassa siullermik, apeqqutinut isersinnaajunnaarneq ajornartorsiutaasimavoq. Tamatumalu kinguneranik ilinniartitsisut arlallit tamanna pillugu saaffiginnimmata ilitsersuutinik taakkununnga nassiussivugut, taakkuli aamma qarasaasiatigut iserniarnertik ajornartorsiutigisimallugu. Tamannalu uagut nammineerluta ugguuna ilikkagaqarfigaarput, tassa taamaattunik elektronikki aqqutigalugu akisassanik nassiussiniaraanni tamanna misilerarluaqqaarlugu aatsaat ingerlanneqarsinnaasoq paasigatsigu, Ilinniartitsisut kattuffianni IMAK-imi siulittaasoq, Sivso Dorph taama oqarpoq.

Aamma atuaruk Atuarfeqarfiit nalilersorneqarnissaannut ilinniartitsisut akissutaat ikippallaartut

Meeqqat atuarfiat pillugu misissuisitsinermi ilinniartitsisut kisimik akissuteqarnissaat siunertarineqanngilaq, aamma atuarfinni pisortat taamatullu atuarfeqarfinnut attuumassuteqartut allat misissuinermi apersorneqarput.