IMAK: siunissami sulisussaqarumagutta atuarfik isumalluutaavoq

- Inuusuttut ilinniagaqalernissamut piukkunnartuunissaat inuiaqatigiit isumagisariaqarpaat.Taamaammat Inerisaavimmut, Meeqqat Atuarfiannik ineriartortitsinermi siuttuusumut, aningaasaliissutinik ikilisaanissamik siunnersuut Inatsisartunut ilaasortat itigartittariaqarpaat. IMAK taama isumaqarpoq.

Dronning Ingridip Napparsimmavissuani peqqissaasunik amigaateqarluni maannakkorluinnaq ajornartorsiorneq meeqqallu Atuarfianni ilinniartitsisunik ilinniarluarsimasunik amigaateqarneq eqqarsaatigigaanni aningaasanut inatsisissatut siunnersuummi Inerisaavimmi sipaarniutigineqartut, Inatsisartut unitsissagaat, IMAK-ip siulittaasua Sivso Dorph neriuppoq.

Sivso Dorphip eqqaasitsissutigaa, Inerisaavik atuarfiup pitsaassusaanik kivitsiniartuusoq, assersuutigalugulu atuartitsinerup pitsaanerulernissaa anguniarlugu kommunini assigiinngitsuni atuarfinni pikkorissaanernik ingerlatsisoq.

- Atuartut amerlanerpaat pitsaanerpaamik angusaqaqqullugit Inerisaavik arlalitsigut iliuuseqarpoq. Atuarfiup pitsaassusaa kivikkutsigu, meeqqat inuusuttullu amerlanerpaat ilinniagaqalernissaminnut periarfissaqalissapput, atuarfimmi angusarissaarnerulernertik tunngavigalugu, Sivso Dorph ima oqarpoq.

Peqqissaasunik, ilinniartitsisunik allanillu ilinniarsimasunik pissaqarnissarput sukkanerusumik angusinnaassavarput, atuarfiup pitsaassusaa sukkanerpaamik kivissinnaagutsigu, IMAK-ip siulittaasua, Sivso Dorph, oqarpoq.