IMAK: Sipaarniartoqarnera naapertuutinngilaq

- Sipaarniartoqarnera naapertuutinngilaq. Atuarfinni pissutsit ajornerusut pilersinniarneqarput. Ilinniagaqarnermik kinguneqartumik atuartarnissaq amerlanerusunut taanna ajornarnerulertussaassaaq, Sivso Dorph oqarpoq.

IMAK-ip siulittaasua erseqqissarpaa, atuartut amerlassusaat aningasartuutillu imminnut naapertuukkajunngitsut.
Taanna erseqqissaavoq, atuarfik 270-inik atuartuuteqarnersoq 520-nilluunniit atuartuuteqarnersoq apeqqutaanani 20-nik klasseqartariaqarsinnaasartoq, taamaasilluni init ilinniartitsisullu pisariaqartitat assigiillutik.

Taamaattumik 2012-imut aningaasanut inatsisissatut siunnersuummi atuarfinnut tapiissutaasartut ikilisinniarneqarnerat naapertuutinngitsut, IMAK isumaqarpoq:
Atuartut ikiliartuaarnerat imaaliallaannarluni aningaasartuutikinnerulernermik kinguneqarnavianngitsoq, Sivso Dorph oqarpoq.

Kisianni taassuma nassuerutigaa, meeqqat sumiiffiit ilaanni malunnartumik ikilippata, aamma aningaasaliissutit ikilinissaat pisariaqalersinnaammat:

- Tunngavissaqarpat taamaaliortoqarsinnaavoq. Soorlu oqarutta illoqarfimmi ataatsimi ullumikkut marlunnik klasseqarfiusuni, kisiannili takusinnaalersimagutsigu klassi ataasiinnaq pisariaqalertussaasoq taamaaliortoqarsinnaavoq. Inatsimmi piumasaqaataasut ukioqatigiiaanut tunngassuteqartut klassillu amerlanerpaaffissaannut tunngassuteqartut taakku ataqatigiissinneqartariaqarput, imatut oqartoqaannarani ikilisaasoqassaaq, Ilinniartitsisut kattuffiata siulittaasua Sivso Dorph oqarpoq.