IMAK: Namminersorlutik Oqartussanit isumaqatigiissut naapertuutsinneqanngilaq
Namminersorlutik Oqartussat IMAK-illu isumaqatigiissutaat apriilimi atsiorneqartoq tassani pineqarpoq.
Meeqqat atuarfianni aqutsisut nukittorsarneqarnissaat, tassungalu atatillugu misissuisussanik, pitsanngorsaanissamullu siunnersuusiortussanik, suleqatigiissitaliortoqarnissaa isumaqatigiissummi allassimassasoq, Namminersorlutik Oqartussat namminneq taamani piumasaraat.
Isumaqatigiinniarnerilli Naalakkersuisut akuersissutigimmatigik qaammat ataaseq suli qaangiutinngitsorluunniit, suleqatigiissitaliamillu suli pilersitsisoqanngitsorluunniit, meeqqat atuarfiat pillugu inatsisissamut siunnersuut tusarniaassutigineqassasoq Ilinniartitaaneq Ilisimatusarnerlu pillugit Pisortaqarfimmit piumasarineqarpoq. Inatsisissamut siunnersuut, suleqatigiissitaliamit pilersinneqartussamit misissorneqartussaq.
- Taamaammat Naalakkersuisut tusarniaatitsiniarnertik unitsissagaat IMAK-ip sakkortuumik kaammattuutigaa, suleqatigiissitamik pilersitsillutik missuisitsinissamillu isumaqatigiinniarnerup nalaani isumaqatigiissutigineqartut piviusunngorteqqullugit.
Allat tamarmik demokratiimut isumaqatigiissutinullu naapertuunnavianngillat, ilinniartitsisut ammasumik allakkaminni tikkuaapput.
