IMAK mattussilersaarpoq

Ilinniartitsisut Kattuffiata IMAK-ip akissarsiat pillugit Namminersorlutik Oqartussanik isumaqatiginniarnerat ajalusoorpoq. Atorfinitsisinermut mattusineq marsip aallaqqaataaniit atuutilissasoq IMAK-ip Naalakkersuisunut nalunaarutigaa.
Allattoq Jaaku Lyberth
februaarip 01-at 2012 06:16

- Ilinniartitsisut ukiumut qaangiuttoornersiarisartagaat qaammammut 3700 koruuniusut Naalakkersuisunit tunniukkumaneqanngimmata isumaqatigiinniarneq unitsinneqarpoq, IMAK-ip siulittaasua Sivso Dorph oqarpoq.

Naalakkersuisut ilinniartitsisunut piumasaqaataat tassaavoq, ilinniartitsisut akunnernik amerlanerusunik katillugit akunnernik 240-nik atuartitsinerusalernissaannik Naalakkersuisut neqerooruteqarnerat IMAK-imit akuersaarneqarumaneqanngilaq, Sivso Dorph oqarneratut, mitallernertut isigineqarluni.

Ilinniartsisut Kattuffianni IMAK-imi ilinniartitsisut 360-it timelærerillu 300-t ilaasortaapput, taakkualu suliffimminnit marsip aallaqqaataata kingorna soraarpata allanik taarserneqarsinnaanerat IMAK-imiit mattunneqassaaq.

Tassalu ilinniartitsisunik soraartoqartillugu nutaanik atorfinitsitsisoqarsinnaaajunnaassaaq, ilinniartitsisunik napparsimasoqartillugu taartaasussanik imaaliallaannaq atorfinitsitsisoqarsinnaajunnaassaq aammalu.

- Atorfinnik nutaanik marsip aallaqqaataaniit mattussiniarlutik IMAK aalajangerpoq aamma nunatsinni atuarfeqarfinni atorfininnissamut isumaqatigiissuteqartoqartinnagu nutaanik atorfinitsisoqarsinnaajunaassasoq, Sivso Dorph oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq