IMAK: Kanngunartuliorneruvoq
Allaammi tamanna mamianartuliornertut taavaat. IMAK-ip siulittaasua Sivso Dorph ilaatigut ima allappoq:
- Ataqqeqatigiinnissaq tunngavigalugu, isumaqatigiinniarnerit ingerlanneqartillugit tusagassiuutit aqqutigalugit oqaaseqartoqartannginnissaanik, allassimasutigut allassimanngitsutigullu malittarisassaqarpoq. Maannalu Naalakkersuisut tusagassiuutit aqqutigalugit isumaqatigiinniarnerit ingerlatilerpaat. Kalaallit Nunaat kisermaassilluni naalakkersuisoqarnerup ingerlanneqarneratut ingerlajartuaarpa? Sivso Dorph aperivoq.
Taamatut aperinerminut innersuussutigai Palle Christiansen marlunngormat radioaviisimut oqarmat, ilinniartitsisut sulinerminni piffissaq atortagaat ataatsimiinnernut artorneqarani atuartitsinermut atorneqartariaqartoq.
Maliina Abelsen Sermitsiamut ullumi saqqummersumut oqaaseqarpoq, Akileraartarnermut Atugarissaarnermullu isumalioqatigiissitap saqqummiussai ilinniartitsisut isumaqatigiissutaani nutaami ilanngunneqassasut.
Tamannalu tassa IMAK-imit naammagineqanngeqaaq. Tassami taakku oqaatigaat ukiup ataatsip matuma siornagulli nutaamik isumaqatigiissuteqartussaagaluarlutik, kinguartinneqaqattaartuarneratali kingorna isumaqatigiinniarnerit aatsaat aallartinneqartut.
