IMAK-ip atorfinititsiniarneq mattussimaannassavaa

Nunatsinni Eqqartuussisuuneq, Søren Søndergaard Hansen, IMAK-ip Namminersorlutillu Oqartussat isumaqatigiikkunnaarneranni isumaqatigiissitsiniartuussagunanngilaq.
marsip 14-at 2012 15:12

Ilinniartitsisut Kattuffiata, IMAK-ip Namminersorlutillu Oqartussat isumaqatigiinniarnerisa ajalusoornerata kingorna, Namminersorlutik Oqartussat siunnersuuteqarput isumaqatigiissitiniartussamik toqqaasoqassasoq, tamannalu ullaaq manna pisussatut siunniunneqarsimagaluarluni, isumaqatigiinnginnerli pissutigalugu tamanna aqagumut kinguartinneqarpoq.

Ilinniartitsisut Kattuffiata IMAK-ip siulittaasuata, Sivso Dorphip suli oqaatigisinnaannginnerarpaa kina namminneq isumaqatigiissitsiniartussatut siunnersuutigisimanerlugu.

- Ullaaq naapeqatigiinnerput ajunngilluinnartumik ingerlavoq, piumassuseqarluartumillu takutitsisoqarluni, Sivso Dorph oqarpoq.

- Søren Søndergaard Hansen narruginngilarput, isumaqatigiissitsiniartutullu periarfissaalluni. Kisianni uagut nammineq toqqaavugut piukkussatsinnik, taannalu isumaqatigiissitsiniartartutut misilittagaqarluarluni, maannali oqaatigerusunngilara kinaanersoq, tamanna aqagu paasineqarumaarmat.

Ilinniartitsisut Kattuffiata IMAK-ip Namminersorlutillu Oqartussat isumaqatigiikkunnaarnerisa kinguneraa, IMAK-ip ilinniartitsisunik atorfinitsitsinissat tamaasa mattukkamikkit.

- Atorfinitsitsinissanik mattussinerit ingerlaannassapput isumaqatigiinniarnerit naammassinissaasa tungaanut. Isumaqatigiinniarnerit qaqugu naammassissanersut oqaatigiuminaakkallarpoq,  IMAK-ip siulittaasua Sivso Dorph oqarpoq.

Ilinniartitsisut Kattuffiata Namminersorlutillu Oqartussat isumaqatigiissutaat kingulleq apriilip aallaqqaataani ukiut marluk matuma siornagulli atuukkunnaarpoq.