IMAK: Inuiaqatigiinni sanngiinnerusunik sumiginnaaneruvoq
Inuiaqatigiinni sanngiinnerusut taamaalilluni sumiginnarneqartut, IMAKimi siulittaasoq oqarpoq.
- Annertusisamik immikkut atuartitsinermi akuerineqareersimagaluartut atuartut aningaasassaqannginneq tiimissaqartitsinnginneq tunngavigalugu taamatut atuartitsinerni aallartitsisoqarsinnaanngilaq isumaqarpunga tamanna akuersaarneqarsinnaanngilluinnartoq tassami atuartuutigut ikiussagutsigit taavalu aamma taakkununnga naleqquttumik neqeruummik tunisissagutta pinngitsoornatik aningaasaliissutigineqartut taakkununnga naammattut tunniunneqartariaqarput.
- Taava sanngiinnerusortagut sumiginnagaanerulertarput?
Tassa sanngiinnerusortagut sumiginnagaanerulertarput taavalu aamma atuarfimmut sunniutai sakkortoorujussuusinnaasarlutik tamakkua tamarmik imminnut ataqatigiissut iliuuseqarfiginissaat pisariaqartorujussuuvoq.
Annertusisamik immikkut atuartitassatut naliliiffigineqaraluartut aningaasassaqartinneqannginnerat kisimi ajornartorsiutaanngilaq, aammali immikkut annertusisamik atuartitassanngortitassatut piukkunnarnersut PPR aqqutigalugu misissorneqarnissaannut ukioq ilivitsoq sinnerlugu utaqqisarneq naammaginartinneqanngilaq. Aammattaaq immikkut annertusisamik atuartitassatut nalilikkat aningaasaliiffigineqareersullu illoqarfinnut allanut nuukkaangamik aningaasaliissutaat malinnaaneq ajortut naammaginartinneqanngilaq, tassami illoqarfimmi ataatsimi aningaasaliiffigineqariarlutik allamut nuukkaangamik aningaasassaqartinnatik immikkut annertusisamik atuartinneqarsinnaanertik annaasaramikku. Aningaasaliissutaallu malinnaasalissappata meeqqamut sunniutissai pillugit Sivso Dorph ima oqarpoq:
- Taassuma pisariaqartitani tunngavigalugu tikitamini atuartinneqarsinnaanngussaaq taavalu atuarfiup tigusisup meeqqap taassuma tunngavii aallaavigalugit atuartitsisinnaanngussalluni ullumikkut pissutsit taamaakkallartillugit taamatut pisoqarsinnaanngilaq.
Naalakkersuisut nalunaarut nammineerlutik tulluarsarsinnaavaat, taamaalilluni meeqqap nuunneratigut aningaasaliissutit malinnaasinnaanngorlugit.
