IMAK: INI kommunilu ajortumik sullissipput
Ilinniartitsisut Kattuffiata siulittaassua, Sivso Dorph ima oqarpoq:
- A/S INI aamma kommunit ajortumik sullissipput. Tassami ilinniartitsisut nutaat taama ajortigisunik atugassaqartinneqartussaanngillat, ingammik nunaqarfinnut nuuttut, Sivso Dorph oqarpoq.
Tunumi nunaqarfimmi Kulusummi ilinniartitsisup qaammat kingulleq oqaluttuaraa, ukiuni arfinilinni ilinniartitsisup illua usseeqisoq oquttorlu najugarisimallugu aammalu oqaluttuaralugu illumi tassani eqqiarsinnaasimanani.
Sapaatip akunnera kingulleq tusarparput Avanersuarmi Siorapalummi ilinniartitsisup illua Kulusummitut ajortigisoq aamma najugarineqartoq.
Siorapalummi illup aserfallassimanerata aaqqinniarnissaanut A/S INI-p sullissinini ajorinngilaa naammagisimaarlugulu.
A/S INI-p illuutit isumagineqarneranut pisortaq, Sven Pedersen, attartortut ajorluinnartunik atugassaqartitaaneri qanoq isumaqarfigaajuk?
- Ima oqaatigilara. Illup Siorapalummiittup attartortinneqarneranut allaffissornikkut akisussaasuuvugut, taamaaliorpugut illumik piginnittup piumasaqarnera naapertorlugu, A/S INI-p illuutaasa isumagineqarneranut pisortaq, Sven Pedersen taama oqarpoq
Illumik piginnittoq tassaavoq Qaasuitsup Kommunea.
Siorapalummi illup usseeqisup iluarsartuunnissaa kia akisussaaffigaa?
- Tassa illunik sanaartortitsisup akisussaaffigaa, uagut aningaasat atorsinnaasagut naapertorlugit illumik iluarsartuussinissarput taamaallaat qanoq iliuuseqarfigisinnaavarput, Sven Pedersen oqarpoq.
A/S INI-p illumut pineqartumut sullissinera pitsaasutut oqaatigineqarsinnaava?
- Aappi, aammali pisoq eqqarsaatigalugu sullissinerput allaanerusinnaasimanngilaq, Sven Pedersen oqarpoq.
Kommunit illuutiminnik isumaginninnginnerujussuat, Ilinniartitsisut Kattuffiata siulittaasuanit aamma oqaatigineqarpoq.
- Kommunit ilinniartitsisunngorlaanut atugaqartitsineri ajuusaarnartuuvoq. Aatsaat taama misigisaqartunik tusanngilagut. Siullermilli oqaatigilara, Nunarput ilinniarsimasunik kissaateqarpoq, ilinniartitsisullu taakkunnga pingaaruteqarluinnarlutik, ingammik nunaqarfimmiunut. Taamaattumik isumaqarpunga kommunit illunik pitsaanerusunik ineqartitsisinnaagaluartut, Ilinniartitsisut Kattuffianni siulittaasoq, Sivso Dorph taama oqarpoq.
