IMAK GA-mut isumaqataavoq
Nunatsinni sulisitsisut peqatigiiffiani siulittaasup meeqqat atuarfiannut sakkortuumik uparuaanera, atuartut tunngaviusumik ilisimasariaqakkaminnik pissarsinngitsoorlutik atuarunnaartartut amerlavallaarnerannik imaqartoq, Ilinniartitsisut kattuaffiannit IMAK-imit isumaqataaffigineqarpoq, taamaattorli ajornartorsiut arlalinnik pissuteqartoq IMAK-ip siulittaasua Sivso Dorph oqarpoq:
- Eqqaasitsissutigissavara Atuarfitsialammi atuarlutik aallartissimasut siulliit aatsaat 2013-mi naammassisussaammata. Atuarfitsialammi atuarsimanerup ilaanik ingerlatsisimasut 2008-mi anisussaassapput. 2013-mi anisussat siulliit atuarfimmut naleqqiullutik tiiminik sivikinnerusumik atuarsimasussaapput, taamaattumik ilumut pitsaassuseq naammattoq pissarsiarisimassaneraat taamanikkussamut anguneqarsinnaassanersoq oqaatigiuminaattorujussuuvoq.
Uparuaaneq Atuarfitsilammut attuumassuteqarpallaanngitsoq, Sivso Dorph naliliivoq.
Meeqqat atuarfiat marloqiusamik ullumikkut ingerlanneqarpoq, annertusisamik nalinginnaasumillu soraarummeertarnerit aqqutigineqartarlutik. Tamatuma saniatigut atuarfik ilinniartitsisussaaleqivoq, atuarfiup ilinniartitsisutut ilinniarsimasunik pisariaqartitaanit tamarmiusunit pingajorarterutit amigaatigineqarmata. Nunaqarfiit illoqarfiillu arlallit ilinniartitsisussaaleqipput, tamannalu pissutigalu atuartut atuarnerminnik aallartitsisartut ilarpassuisa tunngaviusumik ilikkartariaqakkatik aallaqqaataaniilli atuartuunerup sinnera ilanngullugu amigaatigisaraat, Sivso Dorph oqarpoq.
Ilinniartitsisussaaleqinerup saniatigut atuarfinni annertuumik ajornartorsiutaasoq tassaavoq eqqissiviinneq atuarfinni ullumikkut annertuumik atuuttuusoq. Atuartitsinermik aallartitsiniarnerni eqqissiviinneq piffissaajaataangaatsiartartoq, Sivso Dorph oqarpoq.
Ilinniartitsisut sumiiffinni assigiinngitsunut pisartut sivisuallaanngitsuinnarmik atorfeqartarnerat aamma ajornartorsiutaaqataavoq.
- Taamaalilluni atuartut sivisuumik ataqatigiissumik atuarnissaraluat pinngitsoortarluni. Tamanna pissutigalugu kommuneqarfinni sulisunut politikkeqannginneq ajornartorsiutinngortartoq Sivso Dorph oqarpoq:
- Atuarfiup pitsaassusaa kiveriassagutsiguassigiinngitsut pisariaqartitat ullumikkut naammaginartumik piginngilagut.
Meeqqat atuarfianni ajornartorsiutit eqqartorneqartut pillugit Ilinniartitaanermut naalakkersuisoq Doris Jakobsen IMAK-imit ukioq februaarimi ataatsimeeqatiserineqarpoq, ataatsimeeqatigiinnissarlu Inatsisartut ataatsimiinnerata kingorna pissasoq Sivso Dorph oqarpoq.
