Attatip ingerlatai aappaagu apriilip ulluisa aallaqqaataanniit ingerlanneqarunnaassasut Ilisimatusarfiup siulersuisuisa aalajangerpaat, Inerisaavillu ilutigisaanik pinngitsaalineqarpoq atuarfiup ineriartornissaanut pikkorissaanernik ingerlatassaanut pingaarutilinnut taamaatitsissasoq.
-Meeqqat atuarfiata ineriartornera ukiunik arlalissuarnik kinguarsaqqinneqarpoq, meeqqat atuarfiata ineriartornissaraluanut aningaasaliissutaasimasut Ilisimatusarfiup siulersuisuinit allanut atorneqartussatut aalajangiiffigineqarmata. Naalakkersuinermik suliallit Atuarfitsialaap ineriartornissaanut suli pingaartitaqarpat? IMAK-imi siulittaasoq, Sivso Dorph aperivoq.
Ilinniartoqarfiit ulluinnarni ingerlanneqarneranni pinngitsoorneqarsinnaajunnaarluni Attat ilanngussimasoq, Sivso Dorphip tikkuarpaa.
IMAK eqqunngitsumik pineqartutut misigisimavoq, Inerisaavimmummi Ilisimatusarfimmullu aningaasaliissutit kattunneqarnissaat siusinnerusukkut annilaangasaarutigineqareermat. Taamaattumik IMAK-ip sakkortuumik kaammattuutigaa, Inatsisartut aalajangissasut Inerisaaviup ingerlatai ilisimatusarfiup ingerlataanit avissaartinneqassasut, ilisimatusarnermilli ingerlataqarfik Ilisimatusarfimmiitiinnarlugu.
Kalaallit Nunaanni atuarfiup ineriartortuarnissaanut annaassiniarneq pisariaqartipparput, Sivso Dorph oqarpoq.