IMAK: Atorfinitsitsisinnaanissamut mattussineq unitsissinnaavarput

Meeqqat atuarfianni ilinniartitsisut akissarsiaat pillugit politikkikkut akuliuttoqarnissaa taamaasilluni pinngitsoortinneqassaaq. IMAK-ip siulittaasua Sivso Dorph ima oqarpoq:

- Isumaqatigiinniarnerit akimmiffeqarpallaanngitsumik ingerlanissaat anguniarlugu atuarfiillu ataasiakkaat ukiarumut pilersaarusiorsinnaanissaat ajunngitsumik ingerlanneqarsinnaaniassammat, kiisalu aamma aasamut ilinniartitsisunngortussat eqqarsaatigalugit taakkua qinnuteqarsinnaanissaat tunngavilerniarlugu isummerpugut mattussigallarnerput juunip naanissaata tungaanut unitsikkallarniarlugu, Sivso Dorph oqarpoq.

Taamatut atorfinitsitsinnaanissamik mattussinersi sakkortuumik attapparsi, isummassinnillu allanngortitsinersi taava sumik tunuliaqutaqarpa?

- Partiinik naapeqateqarnerput ilaatigut aallaaviuvoq, tassami kaammattoqatigiissimavugut sunalu aamma inuiaqatigiinni pitsaasumik anguneqarsinnaassanersoq oqaloqatigiissutigalutigu. Taamaattumik uagut aamma aaqqeeqataanissamut suleqataarusuppugut, Sivso Dorph oqarpoq.

Partiit assigiinngitsut Poorskinngitsoq, Poorskillu ingerlanerani kingornalu, IMAK-ip ataatsimeeqatigisimavai, atorfinitsitsinernillu IMAK-ip mattussigallarnerata isumaqatigiinniarnerit nalaanni unitsinneqarnissaa partiit kaammattuutigisimavaat.
IMAK-imilu siulersuisut tamanna pillugu ullumi ataatsimiillutik.

IMAK-ip Namminersorlutik Oqartussat taamaammat allagaqaateqarfigai, isumaqatigiinniarnerit nangeqqinneqarnissaat matumani kissaatigineqarlutik, piumasaqaataassappallu mattussigallarnerit unitsinneqarnissaat ammaffigineqarluni. Sivso Dorphilu isumalluarpoq:

- Alloriarneq sunaluunniit nuannersuusarpoq, tassa taassuma takutiinnassavaa piffissaq qanoq atorluarneqartiginersoq massakkuminngaanniit, IMAK-ip siulittaasua Sivso Dorph oqarpoq.

Ilinniartitsisut kattuffiata IMAK-ip Namminersorlutik Oqartussanut isumaqatigiissutaat kingulleq 2010-mi apriilip aallaqqaataani atuukkunnaarpoq.