Imaatigut kabeli Qaqortukkoortussaq borgmesterip aqagu tigussavaa

Kabelissarsuarmik aqagu septembarip ulluisa arfineq-pingajuanni ullaakkut arfineq-marluk qeqqanut tigusisuussaaq Qaqortumi borgmesteri Simon Simonsen.

- Kalaallit Nunaata oqaluttuarisaanerani nutaamut ikaarsaariarneq tulleq imaatigut kabeliliinikkut ikaarsaarfigissavarput. Qarasaasiatigut aqqusersuinikkut nutaajusutigut nunarsuup sinneranut atassuteqaatit nutaat killeqanngitsullu atuutilissapput, maannangaarlu oqaatigineqarsinnaanngilaq inuussutissarsiornernut tunngasut, nunatsinni inuussutissarsiornermik siuarsaaqataasussat suut pilersinneqassanersut. Kisianni uagut periarfissat atorluarniarpagut, Simon Simonsen aqagu pisussamut atatillugu oqarpoq.

Tele Greenlandip siulersuisuini siulittaasoq Kaj Egede aamma Qaqortup kommunalbestyrelseani inuussutissarsiutinut suliffissaqartitsinermullu ataatsimiititaliami siulittaasuusoq oqapoq, ulloq qilanaarluni pissangallunilu utaqqisimallugu. Aqagu umiarsuarmut ilaalluni tikeqataassaaq.

- Tele Greenlandip aningaasaliiffigisarujussua malinnaaffigalugu pissanganaqaaq. Inuussutissarsiutit ineriartortinneqarsinnaaqaat, ilisimagaaralu IT-mik suliallit imaannaanngitsumik ineriartortitaqarsinnaasut pilersinneqassasut. Qularnanngitsumik aamma maani suliffioreersut, ilinniarfiit inuinnaallu qarasaasiamik atuisut kabeli iluaqutissarsiffigissagaat, Kaj Egede Qaqortumit oqarpoq.

Kabelip meeqqanit kalaallisoortunit marlunnit umiarsualivimmi aqagu ullaakkut tiguneqassapput, taamaalilluni oqaluttuarisaaneq siunissarlu takutinniarneqassalluni.

Qaqortumi aqagu ulloq tamaat aamma pisussarpaaloqarpoq, ilaatigut Tele Greenlandip aaqqissugaanik innuttaasut susassaqartinneqassallutik.