Imaatigut assartuinikinnerulersimaneq Royal Arctic Line ilungersornerulersissimavaa

Assartukkat ikiliartuaarneri siornatigulli malunnarsereersimammata Royal Arctic Line siunissami imaannaanngitsunik unammilligassaqalersippaa. Amigartoorutimmi alleriapiloorsimaqaat, tassa siorna ukiup affaata siullermi 22,7 mio. koruuninik amigartooruteqariarluni ukioq manna piffissami tassanerpiaq 59,7 mio. koruuninik amigartooruteqarsimammat.
Allattoq Peter Troelsen, Knud Reimer
septembarip 10-at 2013 09:30

Ukiup ataatsip ingerlanerinnaani assartukkat 11.000 kubikmeterinik ikileriapiloorsimammata Royal Arctic Line-mit malunnaataaqaaq, RAL-imilu siulersuisuni siulittaasup Martha Labansenip tamanna iluarinngeqalugu.

- Sanaartornerit ikileriarsimaneri malunnaataaqaat. Taamaattoqartarneralu Naalakkersuisut nikinnerini pigajuttarluni. Ukiaruli sanaartortoqarnerulernissaa neriuutigiinnarsinnaavarput, ukiullu naanerani annikinnerusunik amigartooruteqarnissatsinnut isumalluutaalluni, Martha Labansen taama nassuiaavoq.

RAL-ikkormiullu aningaasartuutiminnik annertuumik annikillisaasariaqarsimapput suliffeqarfiullu ingerlanneqarnera aaqqissuuteqqinneqarsimalluni. Tassa immikkut ilisimasallit atorlugit RAL-ip anguniakkani maanna angujartuaalersimallugu.

- Aningaasartuutitsinnik ikilisaanitsinni killissarput tikillugu ikilisaasimavugut. Tassa piginnittut sinneqartooruteqassappata nammassinnaassanngilarput, assartuinermilu akit qaffanneqartariaqassallutigit. Qanganngulerpormi kingullermik akinik qaffaagatta, taamaasiorniaruttali nuna tamakkerlugu pisiassat akiisa qaffariapiloornerinik kinguneqaannassalluni, Martha Labansen, knr.gl-imut taama nassuaassuteqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq