Imaatigut angallannermi isumannaallisaaneq pitsanngorsaavigineqarpoq

Issittumi imaatigut angallanneq pillugu utaqqiisaasumik aaqqiissutissanik ataatsimiinnermi Londonimi pisumi aalajangiisoqarpoq, upalungaarsimanissaq eqqarsaataanerulluni.

Umiarsuup aqunneranut atortut ilaata, WWNWS-imik taaneqartartup, nunarsuatsinni tamarmi atorneqartup, annertusarneqarnissaa ataatsimiinnermi isumaqatigiissutigineqarpoq, umiarsuit Issittup imartaani angalasut aarlerisaarutinik assigiinngitsunik umiarsuup radioatigut taamaalillutik tigusisinnaalissallutik.

Canada, Norge Ruslandilu akisussaasuussapput, aamma umiarsuarnut Nunatta imartaani angalasunut.

Qaqortup eqqaani Upernavimmilu NAVTEX-inik nutaanik aasaru atortulersuinissaq Danmarkimit aamma nalunaarutigineqarpoq. Anorsarinnissaanik, anorersuarnissaanik umiartortunullu aarlerisaarutit NAVTEK-imit isumagineqartarput.

Qajartortartut qajartortillutik radioaqqanik VHF-inik siunissami atuisalernissaat ataatsimiinnermi aamma siunnersuutigineqarpoq. Kisimiillutik qajartortut, qaatsiartartut, imaaniluunniit scooterertut siunnersuummi eqqarsaatigineqarput.

Radioararli angallattagaq inummut ataasiinnarmut allagartalerneqarsinnaanngilaq, taamaallaat umiarsuarnut, taamaammat siunnersuut ataatsimiititaliamut ingerlateqqinneqarpoq, ajornartorsiutip teknikkikkut aaqqiivigineqarnissaata tungaanut.

Imarsiornermik Qullersaqarfik, IMO-p Londonimi ataatsimiinnerani Danmark Kalaallit Nunaallu sinnerlugit, peqataasoq, taama ilisimatitsivoq.