Imaatigut angallannermi aaqqiissutissat misissorneqalerput

Angallannermi allanngortiterigaluarnerit innuttaasunik eqqueqisut ukioq nutaamit iluarsiivigineqarnissaat sulissutigineqassasoq, Siumup Naalakkersuisullu siulittaasuat Hans Enoksen neriorsuivoq.

Siumup partiia ukiunik 30-iliinerminut atatillugu immikkut ittumik ataatsimeersuarpoq.

Angallannermut tunngatillugu allanngortiterisimanerit, kukkunerusutut nassuerutigineqassasut iluarsiivigineqassasullu ataatsimeeqataasut arlallit piumasaraat, tamannalu siulittaasup Hans Enoksenip aamma neriorsuutigaa.

”Angallannermut tunngasut tupinnanngitsumik annertuumik aalassassimaarutaapput, ataatsimeersuarnitsinni oqaaseqarfigineqaqattaarput,” Naalakkersuisut siulitaasuat Partiillu Siumut siulitaasua Hans Enoksen oqarpoq. ”Paasilluarsinnaavarput, nunatsinni imaatigut angallanneq pingaaruteqartorujussuuvoq, kisianni inatsisartut peqqusinerat malillugu aningaasat nuunneqarput, kisianni naalakkersuisuni misissoqqissaassavarput qanoq aaqqissuuteqarsinnaasugut.! ”Inatsisartut aningaasaliissutaasa iluani angallannermut aaqqiissutissat tiguniarneqartariaqassapput, akileraarutitigut akitsuutitigullu qaffaasoqassanngippat !” nangillunilu. ”aningaasalersugassagut inissinneqanngitsut ilaatigut 200 millioni missaanniitttut annertussuseqarput, taakkualu qaavatigut angallannermut tunngassuteqartut qaqinneqassapata aningaasarparujussuit eqqartorpavut, taammaattumik arlaatigut eqquisoqarsinnaavoq, suminngaanit aningaasat tiguneqassanersut aalajangiisoqarpat. Ilinniartitaanermut aningaasaliissutaasut iluanni aallartinneqareersut kalluarneqanngilluinarneqarnissaat uagut suliassarivarput” Hans Enoksen oqarpoq.

Ukiumi nutaami 2008-imi aaqqiinerit aallartinneqartariaqassasut Hans Enoksen-ip erseqqissaatigaa, ukiumut inatsisartut ataatsimiinneranni inaarsarneqartussat.

Ileqquusumik ataatsimeersuarnissaq, aappaagu februaarip ulluisa arfernaniit arfineq-pingajuat ilanngullugu Ilulissani ingerlanneqassaaq.