Imaatigut angalasunik ujaasisarnerit amerlavallaarput
Sineriatsinni umiatsianik angalasartut ilaat isumannaatsumik angalasarput, kisiannili umiatsimik angallateqarlutik angalasunik ujaasisarnerit annaassiniartarnerillu suli amerlavaallaaqaat, umiatsiamillu angallateqartunut sillimanissakkut erseqqarissumik aamma maleruaqqusaqanngitsoq, nunatsinni vicepolitiinspektøri Karl Henrik Simonsen oqarpoq.
- Angallannerup allanngorneratigut umiatsiamik angalaniat siunissami amerlinissaat aamma ajoqusertartut ajunaartartullu amerlinissaat soorunami oqaatigiuminaappoq, kisianni ujaasisarnigut annaassiniartarnigullu assigiikannerput ukiut kingulliit amerlasoorparujussuusarlutik. Tassani oqaatigissavara amerlavallaarujussuarput. Ujaasisarnigut annaassiniartannigullu pisariaqanngikkaluartut amerlavallaarujussuarput.
Sillimanissakkut atortulunneq piareersimannginnerlu ujaasisarnernut ajutoortoqartarneranullu peqqutaanerpaasartut Karl Henrik Simonsen oqarpoq:
- Naammattoortakkagut imapput; atortoqanngitsut, radioqanngitsut, kalerrisaaruteqanngitsut, puttaquteqanngitsut annaniuteqanngitsut. Aamma oqorsarsimanngitsut, soorlu angalaniartut salavallaarujusuarlutik ilaat angalasut, taquaqanngitsut iputeqanngitsullu takussaaorujusuupput, ulloq manna tikillugu.
Sillimanissakkut malittarisassat massakkut atuuttut pillugit ima oqarpoq:
- Massakkuugallartoq maleruagassaqanngilaq, imaani angallannermut tunngatillugu, tassa suut piumasarisaanersut. Soorlu pinngitsoorani radioaqarnissaq annanniuteqarnissarlu inatsisitigut aalajangersagaanngilaq.
Imaatigut angallannermi nunat tamalaat imaatigut angallannermi malittarisassaat taamaallaat nunatsinni politiit iliuuseqarsinnaasartut Karl Henrik Simonsen oqarpoq.
- Kisiannili umiatsiaaqqanut taakku atuuttuuvinngillat.
Tamanna pillugu angallataatilinnut pinngitsoorani soorlu radioaqarnissaq, oqarasuaateqarnissaq annanniuteqarnissarlu minnerpaamik piumasaqaataasinnaasut oqarpoq.
- Allatigut maleruagassaqareerpoq allatigut soorlu angallammik imigassartorsimallutik aqutsisunut atatillugu. Imigassartorsimallutik aqutsisunut atatillugu imatut biilertutulli killeqanngikkaluartoq angallammik aqutsisoq imigassartorpallaarsimappat akiliisinneqarsinnaavoq, atortut tungaatigut taakkununnga aasingusunik inatsisiliortoqarsinnaavoq.
Karl Henrik Simonsenip erseqqissaatigaa maleruagassanik allannguinissamut qinikkat oqartussaasut. Oqarpoq umiatsiartunik ujaasinerit - pingaartumik timmisartunik ikiorteqarluni ujaasinerit - ukiumut 100-nit amerlanerujuartut akisoorujusuusartut. Ujaasinerit 3-4 tiiminit sivisunerusut ingammik timmisartut atorneqaraangata ilaatigut 100.000 koruunit qaangerlugit aningaasartuutaasarnerarpai. Politiit angallateeqqanik nakkutilliisarnissaat inatsisitigut piumasaqaataanngilaq.
