Imaatigut angalanermi inatsisit sukateriffiginiarneqanngillat

Siorna aggustip qaammataani Qeqertarsuup Aasiaallu akornanni ujaarineqaraluartut periarfeerunneqartutullu nalilerneqartut Qeqertarsuup avannaatungaani Qeqertarsuatsiami ajunaarsimasut nassaarineqarput. Tamanna imaatigut angalanermi sillimaniarnerup pingaaruteqassusianik qalleqqissaasutut ippoq.

Radioaqqamik peqarsimasuugunik annaanneqarsimasinnaagaluarpat?

Angutit pingasut aggustip arfineq-pingajuanni ullaajugaa Qeqertarsuarmit Aasiannukarniarlutik aallarput, kingornalu periarfeerunneqarlutik. Umiatsiaq meterinik pingasunik takissusilik atorlugu aallarput.

Ullut qulingiluat ujaasisoqareersorlu angutit pingasut ajunaarsimassangatinneqarlutik ujaasineq unitsinneqarpoq.

Radioaqqamillu peqarsimasuugunik annaanneqarsimasinnaassagaluarnersut maanna apeqqutaalerpoq. Inatsisartuni ilaasortap Siumumeersup Isak Davidsenip upernaaq inatsisartuni siunnersuutigaa imaatigut angalanermi inatsisit sukateriffigineqarnissaat. Radioaqqanik VHF-inik pinngitsoorani peqartoqarnissaa ilaatigut siunnersuutigineqarpoq. Isak Davidsen ima ullumi ima oqarpoq:

- Inuuneq erlinnaqimmat, aningaasanillu nalilersorneqarsinnaanani, isumaqarpunga angalanikkut sillimaniarnermi atortunik soorunami aamma akissaqarsinnaasariaqartugut.

Angallannermut naalakkersuisup Jens Napaattuup akissuteqaatimini ilaatigut oqaatigaa naalakkersuisut inatsisinik sukaterinninnatik paasisitsiniaanermik siunnerfeqarlutik.

Naak pisimasoq alianaraluaqisoq, Jens Napaattuup ullumi qalleqqissarpaa inatsisinik sukaterisoqarani paasisitsiniaasoqassasoq.

- Inuit paasisariaqarpaat imaatigut angalaneq navianartortaqartoq, Jens Napaattooq oqarpoq.