Imaani sillimanissaq paasititsiniutigine- qartussanngorpoq

Imaatigut angallateeqqanik angalasunut inatsisitigut Inatsisartuni ilaasortap Siumumeersup Isak Davidsen-ip sukatereqqusilluni siunnersuutaa ullumikkut aalajangiiffigineqanngilaq, Inatsisartulli ukiaru ataatsimiinnissaanni qaqinneqaqqissaaq. Tamanna pillugu Ineqarnermut Attaveqarnermullu naalakkersuisoq Jens Napaattooq ima nassuiaateqarpoq:

- Uani sukeriterisinnaannginnermik oqaluttoqanngilaq. Kisianni suliniaqqinnissaq eqqarsaatigalugu paasitsiniaasoqassaaq. Ilisimavarput umiatsiat nunatsinnut naleqqutinngilluinnartut eqqunneqartartut annertuallaanillu motorilersorneqartartut. Tassunga atatillugu taakku killilersorneqarsinnaanerat eqqarsaatigalugu inatsisiliortoqarsinnaanissaa oqaaseqarninni eqqaavara, Jens Napaattooq oqarpoq.

Pissutsit tamakku pillugit paasisitsiniaasoqarnissaa siunniunneqarpoq.

- Taamaattumik siorna eqqartuinerput ilutigalugu Danmarkimi naalakkersuisumut Bendt Bendtsen-imut saaffiginnissuteqarsimavugut, suliniutit assigiinngitsut piaartumik aallartittariaqaratsigit. Taannalu utaqqeqqaarsusunnagu maannakkut paasisitsiniaanissaq ingerlatissavarput, Jens Napaattooq oqarpoq. Paasisitsiniaanissap aallartiffissaa aalajangersimasumik ullulerneqarsimanngilaq, taamaattorli upernaap ingerlanerani aallartissasoq Jens Napaattooq oqarpoq. Paasititsiniaanissaq aningaasanut inatsimmit 420.000 kronenik illuartitsiffigineqarpoq.

Isak Davidsen-ip siunnersuutaa Inatsisartut ukiaru ataatsimiinnissaanni aappassaaneerneqartigani ataatsimiititaliamut ingerlateqqinneqarnissaa Inatsisartuni amerlanerussuteqartunit isumaqatigineqarpoq.