Imaani pisuussutit assortuussutaasut
Savalimmiormiut ammassassuarniarnerat pissutigalugu EU qeqertaaqqanut killilersuilersaarluni nalunaarutigeqqammerpaa. Tamatumunnga tunngavilersuutigineqartoq tassaavoq, Savalimmiormiut EU-mut, Norgemut, Ruslandimut Islandimullu pisassiissutit pillugit isumaqatiginninniarnernit januaarimi 2013-imi peqataajunnaarnera tamatumalu malitsigisaanik siornatigut pisassiissutaasimasut pingasoriaataannik imminut pisassisimanera.
Ammassassuartassiissutit qaffanneqarnerinut Savalimmiormiunit makrelinik tunngatillugu aamma taamatut tunngavilersuuteqarput.
- Ammassassuit siaruaassimanera allanngornerata malitsigisaanik, ammassassuit Savalimmiormiut imartaanniittut tassungalu neriniartartut amerlisimapput, Savalimmiuni aalisarnermut minister Jacob Vestergaard Shetland Newsimut oqarpoq.
Savalimmiormiut ammassassuarnik nioqqutaannik mattussinermik Savalimmiormiullu Europami umiarsualivinnut tulaassisinnaanerinik killilersuinermik kinguneqaratarsinnaavoq. Peqatigitillugu EU Kommissionip Savalimmiut 'nunatut piujuaannartitsinissamik tunngaveqarani aalisarfiusutut' naqissusernialersaarpaa.
Kommissionip naliliinera malillugu, Savalimmiunut killilersuiniarnermi nunat ilaasortat akornanni amerlanerussuteqartunit taperserneqarnissaq naatsorsuutigineqarpoq. Savalimmiut qisuariaateqarnissaminnut qaammammik ataatsimik periarfissinneqarput.
