Imaani kabelikkut attavik Greenland Connect akornuteqarpoq

TELE-POST-ip nalunaarutigaa, nunatsinni nal. naapertorlugu 01.30 Kalaallit Nunaata Canadallu akornanni imaani kabelimi Greenland Connectimi ajoquteqartoqarnera paasineqartoq.
Allattoq Simon Uldum -
maajip 03-at 2013 10:32

Misissuigallarnerit takutippaat ajoquteqartoqalernera Nuup aammalu Canadami Miltonip akornanni kabelip attaviani ajutoornermik pissuteqartoq.

Uuttuinerit annertunerusut suliarineqareernissaannut ajoquteqarfik Miltonimi nunnigussivimmiit 166 km-it aamma 263 km-it akornanni ungasitsigisumiippasippoq, TELE-POST-imi teknikkeqarnermut pisortaagallartoq, Kim Schwatz paasissutissiivoq.

Taassuma aamma paasissutissiissutigaa,ajoquteqarfik itissutsimi 253 meterit aamma 324 meterit akornanniittoq, ajoquteqalerneranullu suna pissutaanersoq maannakkumut ilisimaneqanngitsoq.

Ajoquteqalerneq nunatsinni kiisalu Kalaallit Nunaata silarsuullu akornanni interneternermut sunniuteqassanngilaq, tamaangami imaani kabelikkut attaveqartitsineq tamarmi Islandikkoorpoq.

Attavik Greenland Connectikkoortoq Island aqqusaarlugu Canadamut ingerlaarpat ajoquteqalernerup nunani tamalaani atuisugut eqqussavai. Atuisut taakku TELE-POST-imit attavigineqarput.