Imaani isumannaallisaanerup sukateriffigineqarneratigut ilaasartaatit eqqugaapput

- Imarsiornermik qullersaqarfimmut immikkut qinnuteqarsimagaluarpugut, tamannali itigartitsissutigineqarpoq, umiarsuarmi Orasilami ajutoortoqarnerata kingunerisaanik, Arctic Umiaq Linemi pisortaq Jette Larsen oqarpoq.

Kangaamiunut Arsummullu angallassisarunnaarneq marlunnik tunngaveqarpoq.

- Meeqqanut, pualasuunut, innarluutilinnut utoqqarnullu atallaanik puttasinnaasunik pissarsisinnaanngilavut, ingammik ikaartarfimmi puttasuliami atallaalersortitsisoqartassapput, Jette Larsen oqarpoq nangillunilu:

Misilittakkat tunngavigalugit ilaasut atallaalersornissaat ajornakusoortarsimavoq, umiarsuullu naalagaata naliliinera naapertorlugu puttasinnaasunik atallaalersuisarneq atulersinneqarpat tamanna pitsorippallaanngitsunut suli ajornerusumik kinguneqartitsisinnaavoq.

Kangaamiunit uani sapaatip akunnerani inuit sisamat inniminniisimagaluartut Royal Arctic Bygdeservicep umiarsuaataannut nuunneqarput. Inniminneereersimagaluartut inniminniiniartullu Royal Arctic Bygdeservicep umiarsuaataannut aamma innersuunneqartalissasut, Arctic Umiaq Linemit oqaatigineqarpoq.

Arsummut angallassisarsinnaaneq pillugu Sarfap Ittup paarlatsissaanik Royal Arctic Bygdeservice misissuivoq. Uani sapaatip akunnerani Sarfaq Ittummit angallassisoqarpoq meeqqanilli ilaasoqaqqusaanngilaq. Piumasaqaatit allannguiffigineqarneratigut Arctic Umiaq Linep inniminniinerit qanoq amerlatiginersut manna ilisimatitsissutigisinnaanngilaat, naatsorsuutigineqarporli 2008-miit 2009-imut sanillersuukkaanni angalaniartut 650-t missaanniittut eqqugaassasut