Imaani isumannaallisaaneq sukateriffigilerpaat
Silaannaap allanngornerata malitsigisaanik issittumi umiarsuit angallannerat annertusivoq. Issittulli imartai mingutsitsisoqassappat akornuserneqarujussuartussaapput. Taamaammat Søfartsstyrelsen suliassinneqarpoq Nunatta imartaani angallannerup isumannaallisarnissaanut iliuusissamik suliaqaqqullugu. Tamanna takuneqarsinnaavoq Søfartsstyrelsep aamma Aningaasarsiornermut inuussutissarsiornermullu ministeriaqarfiup angusassat pillugit isumaqatigiissutaanni 2011-miit 2014-imut atuuttussami.
Danmarkimiit nunanut allanut piumasarilersaarneqarpoq umiarsuit takornariartaatit allanik ingiaqateqarlutik aatsaat nunatta imartaani angalasassasut arlaatigut ajutoortoqaratarsinnaaneranut ajunaartoqarsinnaaneranullu upalungaarsimaniutip ilaatut. Tamanna FNip imarsiorneq pillugu suleqatigiffianut IMO-mut anngunneqareerpoq naammassilluguli suli isumaqatigiinniutigineqarani.
Danmarkip taamatut piumasaqarnera nunat issittumiittut tapersereerpaat ilaatigut piumasaqaatiginiarneqarmat issittumi umiarsuit angalasut inuttaat issittumi imarsiornermi ilinniarsimallutillu sungiusarsimanissaat. Aamma piumasarineqarpoq umiarsuit timitaat sikumut issimullu naleqqussarsimassasut. Minnerunngitsumillu piumasariniarneqarpoq umiarsuit takornariartaatit allanik ingiallorteqarlutik aatsaat issittumi angalasassasut.
- Umiarsuaq ajutoortoq ikiortissamut qaninnermut ungasissorujussuusinnaavoq umiarsuit angalasut akuttusinnaanerat pissutigalugu, taama Søfartsstyrelsen tunngavilersuivoq.
Søfartsstyrelsemit Namminersorlutik Oqartussat attavigineqassamaarput ilaatigut siunertaralugu Nunatsinni kilisaatini suliffimmi isumannaallisaanerup pitsanngorsarnissaa siunertaralugu.
