Imaani angallannermi siunnersuutit
Imaatigut angallannermi ajunaartarnerit annikillisinniarlugit iliuusissanik siunnersuutit qaammatip uumma naanerani saqqummiunneqassaaq.
Imaatigut angallannermi ajunaarnerit, piffissami kingullermi tusallattaartuarpavut. Ajoraluartumilli iluatsitsiviunngitsumik ukioq mannaannaq, angallannermi ajunaarnerit qassiunersut politimestereqarfimmit paasisaqarfiginngitsoorpavut.
Ineqarnermut Attaveqaateqarnermullu Pisortaqarfik, imaatigut angallannermi isumannaatsuunissaq pillugu 2005-imili paasisitsiniaalluni aallartippoq.
Qaammatillu uumma naalernerani, suleqatigiissitaliaq, danskinik kalaallinillu inuttaqartoq, imaatigut angallannermi ajunaartarnerit ikilisinniarlugit, iliiuusissanik inassuteqassaaq.
Inassutigineqartut aallaavigalugit, ukiamut siunnersuusiortoqassaaq inassutigineqartoq qanoq piviusunngortinneqarsinnaanersut, Lene Riis, Ineqarnermut Attaveqarnermullu Pisortaqarfimmersoq ilisimatitsivoq.
Inassutigineqartut ilagaat, umiatsiarsinermi pinngitsoorani ajutuulernermi sillimaniarnermut atortunik pisinissaq aammalu sunngiffimmi inuussutissarsiutigaluguluunniit, nunakkut imaatigullu angallannermi sillimmasernissamut piumasaqaateqarnissaq.
TV-kkut paasisitsiniutit saniatigut, ulluni makkunani KNI-p pisiniarfiinut kalaalimineerniarfinnullu, puussiat 40.000-it agguaanneqarput, taakkununnga naqinneqarsimallutik, atortunut sillimaniarnermullu siunnersuutit.
Pisortaqarfup ilanngullugu ukiamut misissuiffiginiarpaa, umiatsiaaqqat motorillu pillugit paasisitsiniaanissaq pisariaqartinneqarnersoq, motoorit sakkortuallaat umiatsiaaqqanut atorneqarnerat pissutigalugu ajutoornerit pisartut pasinarmat, Lene Riis, Ineqarnermut Attaveqarnermullu Pisortaqarfimmi, angallannermut immikkoortortaqarfimmeersoq ilisimatitsivoq.
