Ilusilersuisartoq Aviaaja Ezekiassen Danmarkimi ilusilersugaalluartumut unammeqataasoq

Arne Jacobsenip issiavik ilusilersugaa “Ægget” imaluunniit Poul Henningsenip kanngussammik qulliliaa alutornarluinnartoq “Koglen” ilisimassagunarpatit.

Maannali kalaaleq ilusilersuisartoq, Danmarkimi ilusilersuillammattut tullinnguussinnaavoq.

33-nik ukiulik, Aviaaja Ezekiassen Nuummi inunngorlunilu peroriartortoq maanna Københavnimi najugaqarpoq, taannalu DR-ip tv-kkut aallakaatitassiaanut “Danmarks næste klassiker”-imut peqataavoq, tassanilu ilusilersuisartut assigiinngitsut tallimat sapaatit akunnerisa pingasut ingerlanerinnaani Danmarkimi ilusilersuillammanngorniuupput.

- Misiligarluarneqarlungalu sukataartinneqarpunga. Pequtit sapaatini akunnerni pingasuni ilusilersorlugillu pilersinneqartussaapput. Piffissaq sivikitsunnguuvoq, Aviaaja Ezekiassen KNR-imut oqarpoq.

Aallakaatitassap immikkoortuini tamani ilusilersuisartut pequtimik ilusilersuisassapput. Immikkoortuni tamani ajugaasoqartassaaq, aallakaatitallu naggataanni pequtit ajugaassutigineqartut akornanni ajugaasumik toqqaasoqassalluni, taannalu Danmarks næste klassikerinngussaaq.

Aviaaja Ezekiassen immikkoortumi siullermi nerrivimmik ilusilersuivoq, Tassanili ajugaanngilaq, kisianni immikkoortup aappaani nunarsuarmi pissutsinit isumassarsiorluni qulleq ilusilersukkani ajugaassutigaa.

Nunatsinnit nunarsuarmiillu isumassarsiortoq

Aviaaja Ezekiassenip isumassarsiani maannakkut inuiaqatigiinni pisunit isumassarsiarai. Immikkoortup aallaani qaammartartoq qullinngortinneqarsinnaasoq ilusilersorpaa.

- Nukissiornermik maanna ajornartooqqasoqarpoq, tamanna pissutigalugu Danmarkimi Europallu sinnerani sarfamik sipaarniarpugut, aqqusinermilu qaammaqqutit aamma qaminneqartarlutik, taanna oqarpoq.

Qulleq atuisumik toqqissisimanermik pilersitsissaaq.

Aviaaja Ezekiassenip kalaallit kulturiat isumassarsiffigisarlugu nassuiaatigaa.

- Kalaallinit tunuliaqutaqarnerma malittuassagaanga qularutissaanngilaq. Nunagisamit eqqaamasannik isumassarsiorsinnaalluarpunga, taanna oqarpoq, nangillunilu:

- Aallakaatitassiamut kulturimit isumassarsiornissaq ajornakusoorpoq, kisianni kalaallit kulturianit isumassarsiortarnera ileqquuvoq.

Ilusilersuisartuuneranut aallarniilluartoq

Aviaaja Ezekiassenip aallakaatitassiamut peqataanini sakkortusoq nassuerutigaa.

Taanna aallakaatitassiamut peqataanngitsiarnermini Danmarkimi ilusilersuisartut akornanni Finn Juhlip ilusilersuisartunut nersornaataanik nersornaaserneqarpoq. Tamannalu pissutigalugu aallakaatitassiamut atatillugu aamma attavigineqarpoq.

Aviaaja unammillerumatuujunngilaq, taamaammat taassuma peqataanini imminut ilikkagaqarfigisinnaassallugu neriuutigalugu peqataavoq.

- Siullermik aalajangiipallannissamut pikkorinneruleriartorpunga. Illuatungaanili ilaat piffissamik atuiffiusariaqartut ilisimavara, taanna oqarpoq.

Tamatuma saniatigut nammineq ilusilersukkamilu sanaartornerata akornanni suleqatigiinnermut ilikkagaqangaatsiarpoq.

Kina ajugaassava?

Aallakaatitassiap immikkoortuiata pingajuat maanna tikinneqarpoq. Taamaammat Danmarks næste klassikerimik kina ilusilersuissanersoq peqataasut kisimik ilisimavaat.

Aviaaja Ezikiassenilli tamanna suli saqqummiuteqqusaanngilaa.

Aallakaatitassiamut peqataaneq immini aamma ajugaaneruvoq.

- Angusinnaanngisaagaluarmut tamanna qaammaassiniaruvoq. Innuttaasorpassuit suliannik takunnissapput. Nuna tamakkerlugu tv-kkut aallakaatinneqarpoq, taamaammat qanoq suliaqarsinnaaninnik Danmarkimut nunatsinnullu aamma takutitsingaatsiarsinnaavunga. Taamaammat ilusilersuisutut namminersortut ingerlalluarnerulernissannut alloriarujussuarfiussasoq neriuutigaara.

Aviaaja Ezekiassen Nuummi Katuami marsip 16-ianit saqqummersitsissaaq.