Ilumoortoq oqaatigissallugu sakkortuallaarsimanerpa?
Issittumi ilisimatuup J.P. Koch-ip pigisatoqai 1988-mili nassaarineqarmata, nunap assiga assammik titartagaq akornanniippoq. Nunap assiga tassavoq 79 Fjord-imut, Mylius-Erichsen-ip Høeg-Hagen-illu ajunaarfigisimasaannut assiliaq. Nunalli assiga sukumiisumik aatsaat aasaq kingulleq misissorneqarpoq, qinnguartaat immikkuullarissoq, skanneri Københavnip Universitetiata Nunat avannarliit pillugit ilisimatusarfianniittoq atorlugu. Nordøstgrønlandsk Kompagnimeersut marluk misissuisuupput, aappaalu Steffen Holberg-illu ima oqarpoq:
- Koch-ip allagarisimasai pinerluttulersaarutitut pikkunartutut allaat taaneqarsinnaasoraakka. Oqaluttuap aallaqqaataa naaneralu ilisivagut, akunnerinili susoqarsimanersoq naluarput. Ilisimasavut ikittuararsuupput, taakkutuanngullu sumiffissiuinermi aammalu susoqarsimasinnaaneranik misissuinermi aalajangiisuulluinnarput, Steffen Holberg oqarpoq.
1908-mulli utersaalaariata: Danmarksekspeditionimi peqataasut qimussertartoqatigiit 1-imik taagorneqartut periarfeerummata periarfeerunneqartut ullorsiutaallu ujaariartorlugit J.P. Koch, Kalaaleq Tobias Gabrielsen qimussertoralugu aallarput. Taakkualu Jørgen Brønlund-ip timaa nassaaraat, taassumalu allatarisimasaa kingulleq ukiuni 100-ni tusaamajuarsimasarput, tassa Mylius Erichsen-ip Høeg Hagen-illu 79 Fjord-imi ajunaarsimanerinik nalunaarut nassaarineqartunut akuulluni.
Koch taamani pisortatigoortunik naatsumik nalunaarpoq, ajunaartut taakkua marluk aputeqaqimmat ujarsinnaasimanagit. Koch-illi nunap assiliaa sukumiisumik misissorlugu aallanik paasisassartaqarpoq:
- Nunap assiga misissoraanni ,79 Fjordip qeqqinnaani Eli Knudsen-ip qeqertanik taaneqartartuni Koch toorniliosimavoq, taanna tikkuuselugu ungatatigut ningaliusaliorluni allassimallunilu: "Taamaallaat uani". Toorneq taanna skannerimik misissuinitsinni aatsaat takuarput. Aamma takusinnaavarput, Koch-ip titartagaa sanningasuusoq , krydsiinnaanani. Uanglu pasinninera naapertorlugu, taanna allaasinnaanngilaq Mylius-imut Hagen-imulluunniit tunngasoq. Koch-ilu ima allassimaguni: "Taamaallaat uani"-mik, taava allaasinnaanngilaq Koch aamma tassaniissimasoq, Steffen Holberg oqarpoq.
Tassalu Steffen Holberg naapertorlugu ilisimasassarsiortut taakkua marluk timaat Kochip nassarisimavai. Tamannali arlaannik kikkut tamarmik tusassanngikkaat isummertoqarsimasoq, Steffen Holberg isumaqarpoq.
Toqusut tamaasa nassaarineqarneri sooq oqaluttuarineqassannginnersut, Kochip nunap assingata qulaani nassuiarsimavaa:
"Wegener Trolle-llu isumaqarput pisimasoq saqqummiunneqassanngitsut. Pisimasut avaanngunarpallaarput. Tobias ilisimasaqanng.." Issuaaneq naavoq.
Koch-illumi taamatut allataqarsimasinnaanera Steffen Holberg-ip ataasiinnarmik nassuiaatissaqarsoraa.
- Tamaani nanorpassuaqarnera ilisimaneqarpoq, toqungasullu timaasa ukiup affaani uninngasimasut nannunit nassaarineqarnissaat ilimanartorujussuuvoq. Ilimananngilarlu Københavnimut angerlarunik nassaat taamaattut oqaluttuarerusussagaat. Takusallu taakkua avaanngunarpallaartuusimassapput, Steffen Holberg oqarpoq.
