Ilulissat unnuaani arpannissaq
Nunatta avannaani pinngortitarsuarmi kusanartumi arpaffissaq unnuamilu inoqarfiuallaanngitsumi pisussaq, arpattartunut misilittagaqareersunut aaqqissuussaavoq. Arpaffissallu 5 kilometerimit 19,8 kilometerit tikillugit isorartussusseqarput.
Tallimanngornerulli unnuaani arpannissaq sioqqullugu ullumi pingasunngornermi Ilulissani arpalluni avannaani pissartanngorniuttoqassaaq, aqagulu sisamanngornermi Inuiattut ullorsiornermi aamma arpatsitsisoqassalluni.
Tamatumani arpaffissat inuusuit utoqqaanerusullu arpaffigisinnaasat assigiinngitsunik takisusseqarput.
Arpannissamik aaqqissuussat ulluni tulleriinni pingasuni pisussat naggaserlugit arfininngornermi Ilulissat Timersortarfiani naggataarnersiortoqassaaq, naggataarnersiornermilu peqataasut akissarsiassaannik agguaasoqassaaq.