Ilulissat tassaajunnaarpoq sikaritsikut illoqarfiat

Nunarsuarmi Peqqinnissaq pillugu Suliniaqatigiiffissuup pujortartannginnissaq malunnartinniarlugu ippassaani maajip 31-at ulloritippaa, sikaritsikullu 70 kiilu sinnillit Ilulissani katersorneqarput.
juunip 02-at 2010 10:09

Nalunaaquttap akunnerisa pingasut ingerlanerinnaani tamanna pivoq, Ilulissanilu meeqqat atuartut katersuinermi peqataalluaqaat.

Klassi sikaritsikunik amerlanerpaanik katersisoq filmeriarnissamut bilitsinik eqquivoq, taamaammat atuartut ulapputeqaat. Eqquisut tassaapput Atuarfik Mathias Storchimi 6.b-mi atuartut.

Sikaritsikunilli katersuineq naammassereeraluartoq suna tamarmi suli naammassinngilaq - sikaritsikummi Ilulissat illoqarfiata qeqqani saqqummersinneqassapput, innuttaasullu eqqoriassavaat pujortartartut sikaritsinut aningaasanik qanoq atuitigisimanersut.

Taanna eqquiniaatitsineq aamma akissarsiassartaqarpoq - ajugaasummi Hotel Arcticimi inunnut marlunnut nerinissaq eqqussavaa.

Sikaritsikunik katersuineq nuannisarnerinnaanngilaq - meeqqammi atuartut pujortartarnerup qanoq navianartiginera pillugu aamma oqalugiarfigineqarput - aamma sikaritsikut pinngortitamut igiinnarneqaraangata tamanna qanoq kinguneqarsinnaanersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq