Ilulissat talittarfiat allilerniarneqarpoq
-Pisarialerujussuuvoq. Ilulissat takornariaqarnikkut ukiorpassuarni ineriartortorujussuuvoq, aamma aalisartut umiarsualivimmik atuisuusorujussuullutik, Jess Svane oqarpoq.
- Ajuusaarnaraluartumik talittarfimmi puttasut nuuttaqattaartinneartarput, sikunit innarlerneqartuartarlutik. Pingaarteqarluinnarpoq taama pisoqartuartarnera qaangissallugu, isumannaallisaaneq tamatumani aamma pingaaruteqarluinnarmat, borgmester Jess Svane Ilulissani talittarfeqarnerup misissuiffigineqarnissaata pingaaruteqassusaa pillugu taama oqarpoq.
Misissuisoqarnissaalu Ineqarnermut, Angallannermut Attaveqanermullu Naalakkersuisup Jens B. Frederiksenip aamma Qaasuitsup kommuniata isumaqatigiissutigaat. Suleqatigiissitaq Christen Sørensenimit siulittaasuuffigineqassaaq, kiisalu Qaasuitsup kommunianit inuussutissarsiornermut attuumaassuteqartunit ilaasortaaffigineqassaalluni. Suleqatigiissitaq ukioq naatinnagu pilersinneqassasoq innersuussutaalluni.
- Teknikkikkut suna periarfissaassanersoq siullermik misissuiffigineqaqqaassaaq, Jens B. Frederiksen oqarpoq.
- Talittarfik allamut inissinneqassava imaluunniit allisarneqassava? Aamma atuinermut tunngatillugu imminut akilersinnaassuseqassanersoq misissorneqassaaq. Namminersorlutik Oqartussanit pigineqassavaa ingerlatsivimmilluunniit pilersitsisoqassanerpa, soorlu Nuummi pilersitsisoqarsimasoq, Ineqarnermut, Angallannermut Attaveqarnermullu Naalakkersuisoq Jens B. Frederiksen oqarpoq.
Ilulissani talittarfiup ilaaniipput quersuaq, Royal Greenlandip tunitsvia, talittarfiullu akianiillutik Halibut Greenlandip tunitsivia puttasulik aamma amutsivik, qaqitsivik.
Ilulissani talittarfimmi ilaasartaatit salliutinneqarlutik talissinnaatitaapput, pajuttaatit tulliullutik kiisalu talinnissamut inniminniisimasut, soorlu aalisariutit imaluunniit takornariartaatit pingaartinneqarlutik. Talittarfimmillu atuisoqariartuinnarpoq, borgmester Jess Svane oqarpoq.
-Atuisut amerliartuinnaavipput, soorlu aamma aasakkut Ilulissat saanni kilisaatit, takornariartaatit pajuttaatillu kisaqqallutik utaqqisariaqartartut, Jess Svane oqarpoq.
