Ilulissat: Seqineq - aammaarluni - piffissaq sioqqullugu nuivoq

Nuannaajallannermi horaartorneq aamma qummoroortartunik aallartitsineq. Tassa seqernup kaperlareerluni nueqqinnerani tassanngaannaartumik nuannaajallanneq.

Tamanna Ilulissani innuttaasut ilaasa ippassaq sapaammi misigivaat, kaperlareerneranimi seqineq killingusaamit nuivoq. Seqinermi killingusaamit siornali novembarip naajartorneranit nuisimanngilaq.

- Tassa ippassaq sapaammi januaarip 12-ani ullup qeqqariilaartoq seqinniassalluta pileritsariasaarpugut, Brian Grønvold oqarpoq, nangillunilu:

- Ippassaammat arfininngornermi seqineq aamma takuneqarpallariareersimammat, Ilulissani Sermermiut eqqaanut qaqqajunnannguamut meeqqakkalu nuliaralu qaqiartorpugut, seqinerlu takullutigu ullormik ataatsimik siusinaarpasittoq.

Kaperlareerlunilu seqernup nueqqinnera Brian Grønvoldimut ilaqutaanullu, ilisarisimasaannullu Sermermiuni qaqqami nikorfaqatigisaannut, nuannaajallatsitsivoq.

AAMMA ATUARUK Seqineq pisarnerminit nuiaarneruvoq

- Nuannappugut aamma horaartuuppugut, nalunngisattalu ilai aamma tappikaniittut qummoroortartorput, Brian Grønvold oqaluttuarpoq.

Brian Grønvold Ilulissani ukiuni 20-ni kingullerni najugaqarpoq, taannalu isumaqarpoq seqernup nuisarnera ukiuni kingullerni tallimani siusinnerusalersimasoq.

- Ukiuni tallimani kingullerni soorluuna siusinaartarnera takussaaleriartortoq. Taamaammanuna aamma uagut siusinaarluta seqinniartugut - takoqqinnaarlugulu, taanna taama oqarpoq.

Seqineq Ilulissanut sioqqutsilluni aatsaat nuinngilaq. 2011-mi aamma sioqqutsivoq.

Taamanilu nunanit tamalaanit soqutigineqaqaaq, ilaatigut sumit pissuteqarsinnaanersoq ilisimatuut ilaannit eqqoriarneqarluni.

Taamanilu nuiaarneranut pissutaasinnaasutut pingasut eqqoriarneqartut aajuku:

AAMMA ATUARUK Nunatsinni seqineq alutorivippaat

Thomas Posch, Wienimi Universitetimi avataarsua pillugu ilisimatooq, tuluit aviisianni Daily Mailimi 2011-mi issuarneqarluni nassuiaavoq sermersuup aakkiartornera pissutaagunarluni seqineq siusinnerusukkut nuisoq. Taanna taamani aviisimut nassuiaavoq sermersuaq aakkiartornermigut pukkinnerulermat immap nunallu killingat appariartortoq, taamaalilunilu seqineq nuisutut isikkoqalersartoq.

Allatulli aamma isummersortoqarpoq, tassalu nunarsuup kaavinnerata qitermigut sulloqutaata allanngorneratigut seqineq siusissukkut nuisalersoq.

- Ullorissat inissisimaffigisartagaat allanngorsimanngilaq. Allanngorsimasuuppata nunarsuarmi tamarmi malugineqarsimassagaluarpoq. Nunarsuup kaavinnerata qitermigut sulloqutaa nunarsuullu kaavinnera uuttortarneqaannaavippoq, tamannalu peqqissaarullugu aamma pineqarpoq. Allannguuteqarsimasuuppata paasineqariissangaluarpoq, Wienimi silasiorfimmi sulisoq, Wolfgang Lenhardt, taamani taama nassuiaavoq.

AAMMA ATUARUK Flere teorier om solens tidlige ankomst

Taamanilu nassuiaatit pingajuanni eqqoriarneqarpoq qaamanerup qinngornerisa sangunerat pissutigalugu seqineq nuisuusisimassasoq.

- Nunarsuup silaannartaani kiassutsip ississutsillu mumingalersimanerat pissutigalugu seqineq siusinnerusukkkut nuisalersimasinnaavoq. Nunap qaava nillertinnerulerpat nunarsuup silaannartaani kiannerulissaaq, taamaalilluni qaamaneq nunarsuarmut qinngortarpoq seqineq takuneqarsinnaalerluni, naak qilaap immallu killingata ataannikkaluarluni, Danmarkimi silasiorfimmi DMI-mi Kalaallit Nunaata silaanik uuttortaasartoq, soraarninngorsimasorlu, Leif Rasmussen, 2011-mi taama eqqoriaalluni Berlingske Tidendemut oqarpoq.

Ilulissanili ukioq manna seqernup qinngorneri siuliit uterfigeqqeriartigit naggasiutigalugillu:

- Seqineq nueqqimmat assut nuannerpoq. Qiimmaallannaq. Tassa aasariartornialeqaagut, Brian Grønvold oqarpoq.