Ilulissat qeqqanut siunnersuuteqarusukkuit

Ilulissani illoqarfiup qeqqata siunissami qanoq isikkoqarnissaanut pilersaarut, Qaasuitsup Kommuniani Kommunalbestyrelsip ungasinngitsukkut aalajangiiiffigisussaavaa. Taamaalillunilu tamatuma kinguneranik quleriiaanik tallimanik portussusilinnik sanaartortoqalersinnaavoq.
Allattoq Elisa Isaksen
juunip 01-at 2011 04:12

Pilersaarut nutaaq innuttaasunut maanna tusarniaassutigineqarpoq, aamma kommunalbestyrelsimi ilaasortat innuttaasunik qaaqqusipput, taamaalillutik illoqarfiup qanoq ineriartortinneqarnissaanut isumassarsianik siunnersuutinillu saqqummiussisinnaaniassammata.

Tamanna pissaaq sapaatip akunnerata tulliani juunip arfernanni, innuttaasunik ataatsimiititsisoqalerpat.

Illoqarfiup qeqqani allanngortiterisoqarniarpoq, tamaani angallannikkut ajornartorsiuteqartoqarmat, soorluttaaq sanaartukkat allissutissaannik amerlasuunik qinnuteqaateqartoqarmat.

Illoqarfiup alliartornera ilutigalugu, illoqarfimmi biilit amerliartuinnarput. Tamatuma kinguneranik aqqusinertigut angallanneq sukkasuumik ilungersunarsiartortoq, Qaasuitsup Kommunianit nalunaarummi allassimavoq.

Illoqarfiup qeqqa ataatsimoorussamik siunertaqarfigineqassasoq siunnersuutigineqarpoq. Tamaani inissaqartinneqassallutik allaffeqarfiit, akunnittarfiit, pisiniarfiit, sullissiviit inissiallu. Pilersaarummi aamma siunnersuutinut ilaavoq, quleriit tallimat angullugit sanaartortoqarsinnaassasoq.